Аналитика
Израелската војска ги засили нападите низ градот Газа, наводно одлучувајќи да продолжи со плановите за преземање целосна контрола, што само ќе доведе до понатамошни „масовни убиства на цивили“ и раселување, предупредија претставници на ОН за човекови права откако ИДФ ги објави првите чекори од операцијата за преземање на градот Газа.
Израел повика десетици илјади резервисти, додека владата разгледуваше нов предлог за прекин на огнот за да се запре речиси двегодишната војна. „Ги започнавме прелиминарните операции и првите фази од нападот врз градот Газа, а веќе сега силите на ИДФ го држат предградието на градот Газа“, изјави за новинарите бригадниот генерал Ефи Дефрин, портпарол на израелската војска.
Воен функционер, кој претходно во среда ги информираше новинарите, изјави дека резервните војници нема да се појават на должност до септември, период што им дава време на медијаторите да ги премостат јазовите меѓу Хамас и Израел околу условите за примирје.
Но, откако израелските трупи се судрија со борците на Хамас во палестинската енклава во среда, канцеларијата на премиерот Бенјамин Нетанјаху соопшти дека израелскиот лидер го забрзал временскиот рок за преземање на контролата врз упориштата на Хамас и поразување на милитантната група што го предизвика конфликтот со напад врз Израел во октомври 2023 година.
СТРАДАЊЕТО НА ЦИВИЛНОТО НАСЕЛЕНИЕ ВО ГАЗА СЕ ИНТЕНЗИВИРА
Израелските изјави сигнализираа дека Израел продолжува со својот план за заземање на најголемиот урбан центар во Газа и покрај меѓународните критики за операцијата што веројатно ќе предизвика раселување на многу повеќе Палестинци, се вели во извештајот на Ројтерс.
Неодамнешните напади на израелската војска врз Газа беа особено катастрофални во населбата Аз Зајтун, каде што воздушните напади, артилериското гранатирање и огненото оружје се континуирани и интензивни, предизвикувајќи голем број цивилни жртви и уништување на станбени згради и јавни објекти во големи размери, се вели во соопштението на Kанцеларијата на ОН за човекови права, ОХЦХР, на окупираната палестинска територија.
Од 8 август, канцеларијата регистрирала 54 напади врз станбени згради и цели блокови во градот Газа, при што загинале 87 Палестинци, вклучувајќи најмалку 25 деца и цели семејства.
Исто така, регистрирала напади врз засолништа за внатрешно раселени лица, вклучувајќи шатори и училишта, при што загинале најмалку 14.
Овие бројки за жртви „укажуваат дека систематското уништување на градот Газа е веќе во тек“, се вели во соопштението.
Сепак, Канцеларија на Високиот комесар на Обединетите нации за човекови права нагласи дека овие катастрофални бројки се само дел од вистинскиот број на жртви поради недоволно пријавување во такви тешки околности.
Како резултат на неодамнешните напади, стотици семејства беа принудени да бегаат, без никаде безбедно да одат поради ужасните хуманитарни услови низ Појасот Газа.
Оние што остануваат заробени се целосно отсечени од храна, вода и медицински материјали.
ОHCHR нагласи дека „објавената одлука на Израел да преземе целосна контрола врз градот Газа и насилно да го расели неговото население ќе доведе до масовни убиства на цивили и уништување на инфраструктурата од витално значење за опстанокот на населението“.
Канцеларијата гледа како израелската војска ги повторува средствата за војување што предизвикаа масовни убиства, сериозни повреди, присилно раселување, произволно притворање, гладување и обемно уништување во претходните операции во Северна Газа и Рафа.
За да се подготви за офанзивата, израелската војска постојано ги повикува Палестинците да се преселат во Ал Маваси, западно од Кан Јунис.
Сепак, Израел постојано ги напаѓаше шаторите на раселените лица во Ал Маваси, каде што луѓето се борат да преживеат со едвај пристап до храна, вода и други потреби.
ОФАНЗИВАТА НА ИЗРАЕЛ И МЕЃУНАРОДНОТО ПРАВО
Според меѓународното право, Израел не смее да уништува цивилен имот освен ако тоа не е неопходно од воени операции. Сепак, широкото уништување на станбените згради во градот Газа не се смета за императивна воена неопходност.
Дополнително, со принудувањето на целото население на градот Газа и оние што останаа во Северна Газа да се раселат – без засолниште, храна или медицински средства и без индикации за да им се дозволи да се вратат во своите домови во иднина – ОХЦХР е загрижен дека ова се сериозни прекршувања на Четвртата Женевска конвенција.
Хамас, во соопштение на Телеграм, го обвини Нетанјаху за попречување на договорот за прекин на огнот во корист на продолжување на „брутална војна против невини цивили во градот Газа“. „Непочитувањето на предлогот на медијаторите од страна на Нетанјаху… докажува дека тој е вистинскиот опструктор на секој договор“.
Израелскиот кабинет за безбедност, предводен од Нетанјаху, овој месец одобри план за проширување на кампањата во Газа со цел да се заземе градот Газа, каде што израелските сили водеа жестока урбана војна со Хамас во раните фази од војната. Израел моментално држи околу 75% од Појасот Газа.
Многу од најблиските сојузници на Израел ја повикаа владата да размисли повторно, но Нетанјаху е под притисок од некои крајно десничарски членови на неговата коалиција да отфрли привремен прекин на огнот, да ја продолжи војната и да продолжи со анексијата на територијата.
Еден крајно десничарски член, министерот за финансии Безалел Смотрих, во среда објави конечно одобрување на широко осудениот израелски план за проект за населување на окупираниот Западен Брег, за кој рече дека ќе ја избрише секоја перспектива за палестинска држава.
(Фото: ABC, Times of Israel)
