СИЛНИТЕ РЕЗУЛТАТИ НА NVIDIA најавуваат раст на европските пазари

Европските берзи се очекува да се отворат во плус, поттикнати од силните резултати на американската технолошка компанија Nvidia, лидер во вештачката интелигенција. Според проценките, британскиот FTSE 100 треба да порасне за околу 0,62%, германскиот DAX за 0,81%, а францускиот CAC 40 за 0,69% на отворањето.

Nvidia во вторникот по затворањето на Волстрит ги објави резултатите за третиот квартал и ги надмина очекувањата на аналитичарите. Приходите пораснаа за 62% на годишно ниво, на 57,01 милијарди долари, а компанијата најави дека во четвртиот квартал очекува приходи од околу 65 милијарди долари. Извршниот директор Јенсен Хуанг порача дека, и покрај приказните за „меур“ во вештачката интелигенција, Nvidia гледа силна и трајна побарувачка за своите производи.

Позитивното расположение се прелеа и на азиските пазари, каде акциите на чип-компаниите пораснаа уште во раното тргување. По резултатите на Nvidia, раст забележаа и фјучерсите на акциите во САД, што укажува на потенцијално повисоко отворање и на американските берзи.

Инвеститорите во Европа денес ќе имаат релативно помирен ден, бидејќи сезоната на објавување заработки се ближи кон крај. Сепак, вниманието делумно ќе биде насочено кон американскиот малопродажен гигант Walmart, кој денес треба да ги објави своите резултати пред отворањето на пазарите во САД.

Секторот за одбранбена индустрија во Европа останува под лупа откако индексот за воздухопловство и одбрана во средата падна за околу 1,9% и се спушти на двомеско дно. Падот доаѓа во период кога високи претставници од Пентагон пристигнаа во Украина за да разговараат за можен мировен план.

Евростат денес треба да објави податоци за БДП и вработеноста по индустрии за 2024 година, што ќе даде појасна слика за состојбата на економијата во еврозоната. Во Велика Британија, инфлацијата во октомври се намали на 3,6%, што ги зголемува очекувањата дека Банката на Англија би можела да ја намали основната каматна стапка во декември, само една недела пред објавувањето на есенскиот буџет. Британската фунта остана речиси непроменета во однос на американскиот долар во текот на ноќта.