Аналитика
Со услугите за купопродажба на хартии од вредност на пазарот на капиталот, брокерските куќи во првите шест месеци од годинава направиле вкупен промет од 7.763.927.751 денар или над 126 милиони евра. Од тој износ, 73,4 отсто, односно во денари 5.706.65.225 и во евра 92,6 милиони се дело на петтемина берзански актери – „Еурохаус“, Комерцијална банка, „Илирика Инвестментс“, НЛБ банка и „Инвестброкер“ .
Вкупната достигната сума е збир од остварувањата во класичното тргување – од 5.637.090.417 денари (91,5 милиони евра), блок трансакциите – 2.083.795.150 денари (33,8 милиони евра) и од јавните берзански аукции 43.042.184 денари (698,7 илјади евра). Последниве се реализирани рамномерно преку двајца посредници – Комерцијална банка и „Фершпед Брокер“.
Полугодишниот берзански билтен покажува дека од членките на Македонска берза, гледано низ прометот, најмногу работа имало за „Еурохаус“ АД Скопје. Во класичното тргување е забележан промет од 1.428.594.439 денари, односно 23,1 милион евра и во овој сегмент има удел од 25,34%. Во блоковите партиципира со 34,54% и тука се работи за износ од 719.641.860 денари (близу 11,7 милиони евра). Сѐ на сѐ, со посредство на оваа брокерска куќа реализиран е промет од 2.148.236.299 денари (34,87 милиони евра).
Инвеститорите ги барале и брокерските услуги на Комерцијална банка АД Скопје, па оттаму и остварувањето од 1.710.260.315 денари или 27,76 милиони евра. Средствата доаѓаат – 1.374.229.903 денари (22,3 милиони евра) од класичното тргување, 314.509.320 денари (5,1 милион ера) од блокови и 21.521.092 денари (349,3 илјади евра) од јавна берзанска аукција. Во трите сегменти има учество од 24,38%, 15,09 и 50%.
Пресметките покажуваат дека ове два посредника зафаќаат речиси половина, поточно 49,6 отсто од вкупниот промет остварен од сите десет членки. А, кога кон нив ќе се додаде резултатот и од третопозиционираниот брокер „Илирика“, ефектот е 67 проценти.
Со застапувањето на инвеститорските интереси „Илирика Инвестментс“ АД Скопје во берзанските резултати придонела со промет од 1.350.194.349 денари (21,9 милиони евра). Притоа, во класичното тргување партиципира со 18,25%, односно со промет од 1.028.545.649 денари (16,69 милиони евра). А, кај блоковите со 321.648.700 денари (5,2 милиони евра), што значи удел од 15,44%.
Во класичното тргување, преку брокерското посредување на НЛБ банка АД Скопје е направен промет од 362.628.061 денар (5,88 милиони евра) и со тоа учество од 6,43%. Додека во блоковите застапеноста е со 16,48%, а износот е 343.410.128 денари (5,57 милиони евра). Вкупниот промет е 706.038.189 денари (11,46 милиони евра).
На петтата позиција меѓу членките на Берзата со најголем промет е „Инвестброкер“ АД Скопје со 511.563.933 денари (8,3 милиони евра). Во класичното тргување е направен промет од 392.510.037 денари (6,37 милиони евра), а тоа значи удел од 6,96%. Во блок трансакциите учествува со 5,71%, односно со промет од 119.053.896 денари (1,9 милиони евра).
Акции, обврзници… се купувале и продавале со посредништво на уште пет членки на Македонска берза. Шестмесечното остварување на ТТК банка Скопје е промет од 6,1 милион евра, на „Фершпед Брокер“ – 5,5 милиони евра, Стопанска банка АД Скопје – 4,7 милиони евра, „Иново Брокер“ АД Скопје – 3,7 милиони евра и на Шпаркасе банка АД Скопје од 1,5 милиони евра.
