Аналитика
Со пазарен удел од речиси 71 отсто, во текот на минатата година ОКТА ја зајакна лидерската позиција на македонскиот пазар. Исто така и на Косово, со пазарен удел од 36 проценти. Тоа резултира со зголемување на продажбата од 28 насто, а во споредба со податоците од 2021 година.
Таквото достигнување е постигнато во услови на геополитичка тензија која ја влоши енергетската криза во Европа, дополнително зголемувајќи ги цените на природниот гас и електричната енергија, што доведе до зголемен инфлациски притисок кој негативно влијаеше врз потрошувачите и индустријата.
Меѓутоа, крајните годишни резултати покажуваат дека ОКТА не отстапува од утврдената финансиска политика, со акумулирана ЕБИТДА (добивката пред одбивањето на камати, данок и амортизација) од 14,7 милиони евра (910 милиони денари), со што се надминати оние 13,6 милиони евра (839 милиони денари) остварени во претходната 2021 година. Добивката, пак, пред оданочување изнесува над десет милиони евра или 618 милиони денари. ЕБИТДА во четвртиот квартал достигна негативен износ од нешто над два милиони евра (125 милиони денари), што е значително помалку од остварените 3,6 милиони евра (228 милиони денари) за истиот период од претходната 2021, главно поради падот на меѓународните цени на горивата, што доведе до исправка на вредноста на залихите на ОКТА во износ од 1,5 милиони евра (94 милиони денари) и негативен ефект од нивното вреднување од 5,1 милион евра, односно 319 милиони денари.
Исто така, компанијата во текот на целата ланска година бележела раст на обемот на продажбата, а со тоа и зголемување на приходите и профитабилноста. Годишните приходи од продажбата изнесуваат 972,4 илјади евра (59,964 милиони денари), што е значително над сумата од 423,8 милиони евра (26.136 милиони денари) од претходната 2021. Тоа се должи на продажбата реализирана на двата пазари.
Трендот е присутен и кај бруто-маржата, која достигнала 24,6 илјади евра (1,517 милиони денари), што е над претходно остварените 22,3 илјади евра (1.377 милиони денари), како резултат на позитивното влијание од зголемените количини на продадени деривати, растот на меѓународните цени на горивата, зголемените приходи од продажба на електрична енергија и поголемиот надомест за чување на државни резерви.
Компанијата лани инвестирала повеќе од 784 илјади евра (48,348 милиони денари) во одржување на своите складишни капацитети и за реализација на иницијативите за здравје и безбедност.
