Аналитика
Исплатени околу 20 милиони евра поддршка за земјоделците, расте и извозот на македонските земјоделски производи – вакви се последните показатели за движењата во аграрниот сектор, кои, според надлежните, сигнализираат засилен институционален фокус кон домашното производство и неговата конкурентност на пазарите.
Министерот за земјоделство, шумарство и водостопанство Цветан Трипуновски информира дека од донесувањето на Програмата за финансиска поддршка во земјоделството за 2026 година, па сè до последните исплати, кон земјоделците се реализирани средства во износ од околу 20 милиони евра. Тој посочува дека креирањето на програмата не било еднострано административно решение, туку резултат на серија консултации со земјоделските здруженија и со претставници од различни сегменти на секторот.
Во изминатиот период, како што истакнува министерот, Министерството организирало бројни средби со најголемиот дел од земјоделските здруженија, со цел мерките во програмата да се обликуваат врз основа на реалните потреби на производителите. Според него, ваквиот пристап овозможува политиките да бидат пофункционални и поусогласени со предизвиците со кои се соочуваат земјоделците на терен.
Во рамките на институцијата функционираат и посебни потсекторски групи за различни видови производство, во кои, покрај претставници на здруженијата, учествуваат и експерти од научната заедница, бизнис секторот и администрацијата. Во овие групи, како што објаснува Трипуновски, детално се анализираат мерките и нивното влијание врз развојот и конкурентноста на земјоделското производство.
Министерот нагласува дека директната комуникација со земјоделците останува еден од приоритетите на институцијата. Според него, токму преку разговори на терен и постојан дијалог со производителите може да се креираат политики кои навистина ќе дадат резултат во пракса.
Паралелно со мерките за поддршка, статистичките податоци укажуваат и на позитивни економски движења во секторот. Според податоците на Државниот завод за статистика, во 2025 година извозот на земјоделски производи достигнал 416,7 милиони евра, што претставува зголемување од околу 85 милиони евра во однос на претходната година.
Иако е забележан и одреден раст на увозот, кој од околу 177 милиони евра во 2024 година се зголемил на приближно 202 милиони евра во 2025 година, трговската размена и понатаму бележи значителен суфицит. Според министерот, позитивната разлика меѓу извозот и увозот изнесува околу 215 милиони евра.
Трипуновски потенцира дека токму примарното земјоделско производство има доминантна улога во вкупниот извоз. Споредбените податоци покажуваат дека извозот на прехранбени производи изнесува околу 414 милиони евра, што, како што вели министерот, јасно укажува дека примарниот земјоделски сектор е меѓу водечките двигатели на извозните резултати.
Позитивни трендови, додава тој, се забележуваат и во делот на откупот и продажбата на земјоделски производи. Според статистиката, во четвртото тромесечие е евидентиран откуп и продажба во вредност од околу 12,5 милијарди денари, при што е регистрирано намалување кај инпутите, а зголемување кај аутпутите во системот на откуп и продажба.
Според министерот, овие показатели се охрабрувачки сигнал дека земјоделството постепено ја зајакнува својата економска позиција. Владата и Министерството, како што нагласува, ќе продолжат со мерки и политики насочени кон зголемување на домашното производство и кон подобрување на позицијата на македонските земјоделски производи на странските пазари.
(Фото: Unsplash)
