РАБОТНИЦИТЕ ПРЕД ИНСТИТУЦИИТЕ: „Не молиме – си го бараме заслуженото“

Додека растечките трошоци за живот сè повеќе го притискаат семејниот буџет на граѓаните, работниците во Македонија денеска излегоа на улица со јасна порака – минималната плата мора да се зголеми. Со протестен марш низ центарот на Скопје, организиран од Сојузот на синдикатите на Македонија (ССМ), илјадници работници побараа минималната плата да достигне 600 евра, оценувајќи дека сегашните примања не ги следат реалните трошоци на живот.

Протестот започна пред Работничкиот дом, седиштето на ССМ, од каде синдикалците тргнаа во марш низ институциите до кои сакаат да ја испратат својата порака. Првата станица беше Собранието, каде на присутните им се обрати претседателот на ССМ, Слободан Трендафилов. Оттаму протестниот марш продолжи кон Стопанската комора и Владата, каде синдикатот планираше да ги упати своите главни барања до носителите на одлуки и до работодавачите.

Трендафилов порача дека зголемувањето на минималната плата не е прашање на добра волја, туку на заслужена компензација за трудот на работниците. Според него, платите одамна не го следат растот на цените, а голем дел од граѓаните се соочуваат со сè потешко покривање на основните трошоци за живот.

„Минималната плата мора да се зголеми во текот на март, не затоа што некој ќе ни ја даде, туку затоа што ние како работници ја заработуваме“, изјави Трендафилов, додавајќи дека работниците создаваат многу поголема вредност од она што го добиваат како плата.

Тој истакна дека сегашните предлози за усогласување на минималната плата се недоволни и не ја одразуваат реалната економска состојба. Според синдикатот, континуираниот раст на цените на храната, енергијата и основните производи сериозно го оптоварува домашниот буџет на граѓаните, поради што е неопходно поголемо зголемување на платите.

На протестот се приклучија работници од различни сектори и од повеќе градови во земјата. Дел од нив, според Трендафилов, биле изложени на притисоци и закани да не учествуваат во протестот, но сепак одлучиле да излезат и да ја поддржат синдикалната иницијатива.

„И покрај сите закани и притисоци, вие покажавте дека не се плашите. Ние ќе се бориме за работничките права и нема да молиме за нив“, порача тој пред присутните.

Синдикалната борба за повисоки плати, како што нагласи Трендафилов, започнала уште на крајот на јануари и ќе продолжи сè додека не се обезбеди повисок животен стандард за работниците. Покрај минимална плата од 600 евра, ССМ бара и зголемување на платите на останатите работници за најмалку 6.000 денари.

Со маршот низ институциите, синдикатите испратија порака дека без трудот на работниците не може да функционира ниту економијата, ниту државата. Според нив, подобрувањето на работничкиот стандард не е само синдикално прашање, туку и клучен предуслов за стабилно и одржливо општество.