Аналитика
Акцијата на „Окта“ не само што изби на првото место како најтргувана во јули, туку и драстично го зголеми берзанскиот месечен промет. Тоа е логичниот исход по инвазијата врз акциите што почна минатиот, а продолжува и месецов. Со истргуваните 105.465 акции и со достигнатата вредност која претставува речиси половина од вкупниот промет, предизвика промени на топ 5 листата. По подолго време има поместување – акцијата на Комерцијална банка е потисната на втората позиција, а на „Макпетрол“ е истисната од првата петорка.
Во текот на јули „Окта“ откупи вкупно 84.636 сопствени акции во вредност од 500.775.578 денари или за нешто повеќе од 8,1 милион евра. Тоа го стори во 28 трансакции реализирани во три последователни денови, откако претходно акционерското собрание што се одржа на крајот од април, донесе одлука за откуп на сопствени акции во тој број и по цена од најмалку 5.145 и најмногу 5.919 денари.
Кога компанијата ја исполни нормата, настапи грчкиот акционер ЕЛ.П.ЕТ. – Балканики Аноними Етериа Петрелеу, кој сега поседува 710.607 акции, односно 83,96 отсто од капиталот на „Окта“. Минатиот месец имаше шест информации дека ЕЛ.П.ЕТ купува акции, а месецов се појавија две со истата содржина.
Па, во месечниот билтен на Македонска берза за јули, акцијата на „Окта“ бега пред другите и по количината и по прометот од 623.542.931 денар или 10.140.297 евра. Во структурата на прометот зафаќа високи 49,73 проценти. Реализирани се 169 трансакции (најмалу во однос на другите од првата петорка), при што цената на акцијата доаѓа до просечните 5.912,32 денари.
Се случи и тоа. Акцијата на Комерцијална банка е прва меѓу „поразените“, како што на шега се нарекуваат оние кои го освоиле второто место. Истргувани се 9.817 акции преку 892 трансакции. Просечната цена е 23.409,24 денари, а месечниот промет е 229.808.554 денари, односно 3.736.463 евра. Има учество од 18,33 проценти.
Едно место подолу и за акцијата на „Алкалоид“, која во јули доаѓа до просечното ниво од 21.736,45 денари. Со купените 6.407 акции остварен е промет од 139.265.432 денари (2.264.307 евра). Бројот на трансакциите е 429, а во вкупниот промет има удел од 11,11 отсто.
Промет од 85.105.741 денар (1.383.829 евра) е забележан во месечното тргување со акциите на „Реплек“. Просечната цена е 14.752,25 денари, а се работи за количина од 4.410 акции истргувани низ 353 трансакции. Во берзанскиот промет партиципира со 6,79 проценти.
Во 188 трансакции купени се 1.283 акции на НЛБ банка, по просечна цена од 40.772,89 денари. Берзанската статистика за јули бележи промет од 52.311.616 денари или 850.470 евра и учество од 4,17 проценти.
Јулскиот поход по акциите на „Окта“ се пренесува и врз вкупниот берзански промет, кој во споредба со јуни има раст од 116,39 насто. А, станува збор за износ од 1.321.952.373 денари, односно за 21,5 милиони евра.
Другите основни податоци велат – во јули се реализирани 2.723 трансакции, за 61,99 проценти повеќе од јуни; кај пазарната капитализација има плус 7,4 проценти и сума од 301.278.000.235 денари; а берзанскиот индекст МБИ10 е со вредност 8.480,61 и е зголемен за 10,07 проценти.
М.А.
