Аналитика
Поради воведувањето санкции кон НИС може да дојде до недостиг и поскапување на горивото, што според експертите би имало сериозни последици за Србија. Претседателот на Србија, Александар Вучиќ, синоќа на ТВ Информер најави дека Соединетите Американски Држави може да воведат санкции за српската нафтена индустрија уште од 1 јануари, бидејќи таа компанија е во мнозинска сопственост на Русија!
И додека оваа информација има одек во светот, домашната јавност се прашува и какви последици може да има ова ембарго врз обичниот човек, а прогнозите не се толку добри, пишуват српските медиуми. Претседателот на Србија, Александар Вучиќ изјави дека ќе треба трескавично да се бара решение, но додаде и дека тој како претседател во овој момент не е подготвен да разговара за потенцијалното воведување санкции од Србија кон Москва.
Вучиќ додаде дека одлуката на САД е донесена во тешко време, како што рече, почетокот на зимата, крајот на есента. Тој вели дека нашата земја е информирана дека одлуката на САД треба да стапи на сила од 1 јануари.
Експертите велат дека може да има недостиг на гориво, поскапување на дериватите, но и други производи доколку поскапе горивата.
„Треба сериозно да ја разгледаме оваа ситуација, која воопшто не е лесна, и да видиме какви точно ќе бидат санкциите. Ова ќе го оневозможи функционирањето на Нафтена Индустрија на Србија (НИС). Знаете дека Јанаф е главниот канал преку кој доаѓа нафтата до нас, ако се прекинат овие нафтени текови, ние сме во голем проблем. Последиците се недостиг, повисоки цени на горивата, но и на другите производи, бидејќи повисоките цени на дериватите доведуваат до зголемување и на другите цени. Останува само да се надеваме дека ќе најдеме решение, како можеби купување на акции од Русија, за да станеме мнозински сопственик“, истакнува Небојша Атаначковиќ, експерт за нафта од Србија.
И Михајло Рабреновиќ, експерт за стратегиски менаџмент, вели дека доколку санкциите доведат до ограничување на увозот и извозот на нафта и нафтени деривати, тие можат да имаат значително влијание врз обичниот човек во Србија. „Доколку Србија не најде алтернативни извори на снабдување или не успее да ги диверзифицира своите извори на енергија, може да дојде до недостиг на гориво. Ова може да резултира со зголемена побарувачка и, според тоа, повисоки цени за дизелот и бензинот. Во оваа ситуација Србија би можела да се соочи со потешкотии во задоволувањето на потребите од енергија, што освен поскапување, може да доведе и до прекини во снабдувањето со гориво. За обичен граѓанин тоа би значело поголеми трошоци за превоз“, посочува Рабреновиќ.
Исто така, додава тој, зголемените цени на горивата ќе се одразат и на другите сектори од економијата, како што се транспортот, трговијата и преработувачката индустрија, што може да доведе до општо зголемување на цените на стоките и услугите. „Доколку не може да се најде решение за овие прашања, обичните граѓани би можеле да почувствуваат сериозни последици во секојдневниот живот, како што е поскапување на основните прехранбени производи и другите производи. Затоа се исклучително важни активностите и напорите што ќе ги преземе нашиот државен врв, за во време на големи тензии меѓу големите сили, преку дијалог со Руската Федерација и САД, да се дојде до опција која би претставувала краткорочно или среднорочно решение“, смета Рабреновиќ.
(Фото: Википедија)
