ОБРАЗОВАНИЕТО СО НОВ СТИМУЛ: Покачување на наставничките плати од март

Од март следната година наставниците во основното и средното образование ќе ја видат првата конкретна промена на своите плати – зголемување што, според најавите, ќе се движи меѓу 7,5 и 10 проценти. Веста ја соопшти министерката за образование и наука Весна Јаневска, нагласувајќи дека станува збор за договорена мерка која има за цел да ја врати мотивацијата и да ја зацврсти улогата на наставникот во образовниот систем.

Според Јаневска, ова покачување е дел од поширок процес што досега не бил успешно реализиран, а сега конечно добива јасна временска рамка и финансиска поддршка. Таа истакна дека кариерното напредување и натпреварувањето меѓу наставниците се дополнителен стимул за професионален развој, додавајќи дека постигнатите резултати се препознаени и во извештајот на Европска комисија.

Јаневска потсети дека зголемувањето од март е само дел од договорот потпишан меѓу Владата и СОНК, со кој се предвидува најмалку 60 проценти раст на платите во период од четири години. Како што беше истакнато и на собраниската седница посветена на пратенички прашања, во првата година наставниците би добиле 12 проценти покачување, во втората и третата меѓу 7,5 и 10 проценти, а во последната од 10 до 12 проценти.

Министерката нагласи дека овие проценти се минимумот што наставниците ќе го добијат и дека, доколку економските услови и буџетот го дозволат тоа, покачувањата може да бидат и поголеми. Таа додаде дека државата и натаму ќе води сметка за просветните работници, кои, покрај основната плата, имаат право и на различни додатоци предвидени со колективниот договор, како унапредување во ментор или советник, додаток за класно раководство и за работа во рурални средини.

Од доаѓањето на оваа Влада, како што посочи Јаневска, вложени се околу 700 илјади евра во едукација и обуки за наставниците, а тие активности ќе продолжат и во иднина. Целта, според неа, е наставниците да имаат поголеми примања, но и повеќе можности преку професионален развој дополнително да ја зголемат својата плата и статус во образовниот систем.

(Фото: Unsplash)