Аналитика
Сите бегаат од државата затоа што тука нема ни леб. Нема што немаше, нема леб, нема брашно, нема квасец… се само дел од духовитите забелешки на социјалните мрежи, каде што граѓаните се растоваруваат од стресот. Зашто, полиците за леб во трговијата се речиси сосема празни, го снемува брашното и расте интересот за свежиот и сув квасец. Спорот меѓу властите и пекарите продолжува, а обичните луѓе се снаоѓаат.
Претставници од пекарската индустрија во изјава за МИА посочуваат дека замрзнувањето на цената на лебот се коси со уставното право за слобода на пазарот. Велат, подготвени се за разговор со надлежните институции, но само ако добијат официјална покана, а не повик или апел упатен од прес-конференција.
„Се чека Владата да одлучи позитивно во однос на барањата на пекарите. Замрзнувањето на цената се коси со уставното право за слобода на пазарот. Очекуваме поддршка и од другите индустрии, од сите, зашто ако ова ѝ се случува на пекарската индустрија, може да им се случи и на нив“, потенцира во разговор за МИА претставник од Групацијата на мелничко-пекарската индустрија.
Сопственик на една од поголемите мелници во изјава за МИА коментира дека одлуките на Владата не биле потребни, бидејќи мерката за субвенционирана струја дала ефект и цените на лебот биле намалени, а на пазарот можел да се најде леб и за 32 и 35 денари. „Очекувањата дека лебот ќе биде 20 денари не може да се исполнат и тоа едноставно нема да биде, но имаше леб од 32 и 35 денари зависно од квалитетот и грамажата. Во однос на поканата за средба што ја упати министерот Крешник Бектеши, би му порачал дека пекарската индустрија е секогаш подготвена за разговор, но треба да биде официјално поканета, со конкретно наведена тема за разговор, а не преку прес-конференција“, нагласува мелничарот за МИА.
Откако го снема лебот во продавниците, лебот во „Вегера“, по социјалните мрежи се посочуваше како еден редок пример на скопска пекарница која ја запазила цената дадена од Владата. Но, тој одамна е 29 денари и во сета оваа еуфорија тој податок не треба да се нагласува, затоа што нашата работа не е заснована на таа намирница, туку на другите печива, изјави за „Пари“ Јован Јанакиевски, косопственик на оваа пекара.
Се работи за таканаречениот домашен или селски леб од 450-500 грама, тип 500, кој го има во две варијанти – со и без сусам.
„За разлика од фирмите чие основно производство е лебот, со кои јас сега сочувствувам, ние вадиме количини колку да им се најдеме на комшиите од околината, па затоа во моментот не треба врз база на нашата понуда да се вади некаков генерален заклучок за тоа колку треба да изнесува цената“, вели Јаникиевски.
Што се однесува до промоцијата, тој појасни дека дека нивниот леб е постојано во таа фаза, но од страна на маркетите, а не по иницијатива на „Вегера“. „Состојбата воопшто не е за каква промоција, најмалку за себепромоција“, нагласи Јован Јанакиевски.
Горан Трајковски, директор на Државниот пазарен инспекторат, во објава на Фејсбук информира дека инспекторите излегле на терен да проверат дали се почитува одлуката за замрзната цена на лебот. Според него, леб ќе има, бидејќи е недозволиво ваков основен продукт да не е достапен. На производителите им порача дека никој нема да биде поштеден доколку не се почитува одлуката, а економската криза не е за злоупотреба и профитерство.
Според штипските дописници на медиумите, во источниот регион пекарите ја намалиле цената на лебот до пет денари, па оваа намирница може да се купи и за 30 денари. Со образложение дека не само што ја почитуваат мерката, туку сакаат и да им помогнат на своите сограѓани. Зависно од типот и грамажата, лебот се продава од 30 до 33 денари. Со што велат, засега се на границата на рентабилноста. Исто така, во штипските маркети недостасува само лебот од Скопје, а снабдувањето е редовно пекарниците во градот и од Виница и Пробиштип. По намалени цени од 29 до 33 денари.
Се чини состојбата во Скопје е најкритична, каде што граѓаните во страв сосема да не останат без леб, се ориентираа кон месење во домашни услови, па затоа „удрија“ по брашното и квасецот.
