Најголемите банки во Европа ќе станат конкурент на Visa и Mastercard

Групација која вклучува Дојче банка, БНП Парибас и УниКредит иницираа воспоставување на паневропски сервис за плаќање, поддржан од Брисел.

Повеќе од 30 најголеми европски банки и обработувачи на картички планираат да воспостават услуга за плаќање што ќе може да се натпреварува со група американски гиганти за финансии и картички, како што се Visa, Mastercard, PayPal и Apple. Според Фајненшл тајмс, групата е собрана во Европската иницијатива за плаќања (ЕПИ), а нејзиниот претседател Јоаким Шмалцл истакнува дека идејата е да се создаде европски гигант за плаќање, способен да се натпреварува со американски компании.

Иницијативата со седиште во Брисел во моментов обединува околу 40 експерти за плаќање и трансакции со картички. Тие започнаа да работат пред девет месеци, а до септември треба да подготват пан-европска услуга за плаќање што може да се користи за плаќање во физички и онлајн продавници, да плаќаат сметки помеѓу индивидуални потрошувачи и да подигаат готовина на банкомати. Банките кои се дел од оваа иницијатива вклучуваат гиганти како Дојче банка, БНП Парибас, УниКредит, Сантандер и ИНГ. 

Според FT, проектот има поддршка од Европската комисија и европските финансиски регулатори. Јоаким Шмалцл посочува дека ЕПИ досега има добиено повеќе од 30 милиони евра од субјектите што го поддржуваат. Патем, Шмалцл е исто така член на одбор на Здружението на германските штедилници, најголемата организација на германски банки кои работат со граѓани и ревносен поддржувач на иницијативата. Првата апликација за ЕПИ што ќе овозможи електронско плаќање во реално време помеѓу потрошувачите може да биде лансирана уште во 2022 година. Следните алатки за плаќање може да следат во втората половина, посочува Шмалцл.

Плаќањата со картички во Европа претежно ги обработуваат компании со седиште во САД. Според лоби групата Еврокомерц, четири од пет плаќања со картички на „стариот континент“ се обработени од Мастеркард и Виза. Јоаким Шмалцл предупредува дека ваквиот доминантен удел на пазарот на американски сопственици на картички може да им наштети на потрошувачите и трговците, како преку релативно високи давачки, така и од аспект на заштита на личните податоци. 

Проектот „Моне“, поддржан од 24 банки во 2011 година, пропадна поради недостаток на политичка поддршка и неуспех да се развие одржлив деловен модел. Ова не е лесно затоа што платниот систем е привлечен за трговците само доколку го користат многу потрошувачи. Истото важи и од аспект на потрошувачот.