Најавеното ЕУ ембарго за руската нафта ја крева цената на суровата нафта

По падот од девет отсто во однос на претходните две сесии, нафтата денес повторно поскапе поради загриженоста за снабдувањето додека Европската унија работеше на добивање поддршка за забраната на руската нафта и главните производители предупредија дека може да се борат да ја пополнат празнината кога побарувачката ќе се подобри.

Суровата нафта од типот „брент“ поскапе за 1,42 долари или 1,4 отсто на 103,88 долари за барел во 02:32 часот по Гринич, додека американската „Вест Тексас интермидиејт“ се искачи за 1,23 долари или 1,2 отсто на 100,99 долари за барел. И двата договори паднаа за повеќе од 1 долар во раната трговија.

Цените на нафтата паднаа со суровините и пазарите на акции оваа недела, поради загриженоста за ударот на економската активност од продолжените ограничувања на Ковид во Кина и наглото зголемување на каматните стапки во Соединетите Американски Држави. Сепак, страната на понудата сè уште се соочува со предизвици.

ЕУ предложи да се воведе ембарго на руската нафта, но гласањето, на кое му треба едногласна поддршка, беше одложено бидејќи Унгарија се спротистави, а и други држави изразија загриженост дека нивните економии би можеле да настрадаат. Влијанието на ембаргото би можело да биде ограничено ако забраната се намали за да се олесни загриженоста на источноевропските членки, но аналитичарите велат дека цените на нафтата сепак би можеле да бидат повисоки.

„Дури и да видиме олабавени некои од мерките, веројатно е дека санкциите на ЕУ сè уште значително ќе го намалат увозот на руска нафта и рафинирани производи од ЕУ“, рече во белешката аналитичарот на Комонвелт Банка, Вивек Дар.

Истакнувајќи ја загриженоста за снабдувањето, министерот за енергија на Обединетите Арапски Емирати Сухаил ал-Мазруеи во вторникот предупреди дека тогаш кога побарувачката за гориво ќе се опорави од пандемијата на коронавирус, Организацијата на земјите извознички на нафта и нејзините сојузници, заедно наречени ОПЕК +, можеби нема да можат да ја задоволат побарувачката без дополнителни инвестиции.

Неговите коментари уследија по забелешките на министерот за енергија на Саудиска Арабија, принцот Абдулазиз бин Салман дека светот треба да обрне внимание не само на тесното снабдување со сурова нафта, туку и на енергетскиот капацитет пошироко.

Ограничувајќи ги пазарните добивки, доларот се задржа на највисоко ниво во последните две децении пред отчитувањето на инфлацијата што може да навести за изгледите за политиката на ФЕД, што ќе ја направи суровата нафта поскапа за купувачите кои користат други валути.