На Берзата три блок-трансакции во вредност од 1,22 милиони евра

Три блок-трансакции на официјалниот пазар – една со акциите на „Макпетрол“, две со акции на „Македонијатурист“ АД Скопје. Вкупната вредност е 1,22 милиони евра.

Според податоците што ги објави Македонска берза, познат купувач платил 22.200.000 денари или 360,7 илјади евра за 300 обични акции на скопски „Макпетрол“. Тој пакет претставува 0,27 проценти од основната главнина на најголемиот домашен дистрибутер на горива. Трансакцијата е пресметана по цена за акција од 74 илјади денари. Инаку, номиналната вредност е 511,29 евра.

Двете блок-трансакции со акциите на „Македонијатурист“ имаат вредност од 53.302.050 денари, односно над 866 илјади евра.

Првиот блок опфаќа 7.167 обични акции, кои значат 1,58 проценти од основната главнина. Цената за акција е 6.150 денари, а целата трансакција изнесува 44.077.050 денари (716,2 илјади евра). Акцијата на ова акционерско друштво има номинална вредност од 25,56  евра.

Вредноста на втората блок трансакција е 9.225.000 денари или речиси 150 илјади евра. Се содржи од пакет со 1.500 акции, кој претставува 0,33 отсто од почетниот капитал на „Македонијатурист“.