Аналитика
Огромно мнозинство од Канаѓаните мислат дека нивната земја треба да одговори на оган со оган доколку Доналд Трамп ја исполни својата закана дека ќе воведе царини од 25 отсто за канадските стоки и услуги што се продаваат на американскиот пазар, пишува канадскиот весник Глобал Њуз.
Новата анкета на Ипсос, правена исклучиво за Глобал њуз, покажала дека 82 отсто од испитаниците се согласуваат со изјавата дека, доколку Трамп воведе царини за канадски стоки, Канада треба да возврати со воведување царини за американскиот увоз во Канада.
Доцна во понеделникот, за време на прес-конференција од Овалната соба во Белата куќа, Трамп рече дека е подготвен да воведе царина – или данок на увоз – од 25 отсто за канадски стоки на 1 февруари. Тој не потпиша никакви извршни наредби за таа одлука, но, за време на неговиот говор на инаугурацијата, тој навистина рече дека ќе ја збогати Америка со наметнување повеќе даноци за странците.
„Наместо да ги оданочуваме нашите граѓани за да ги збогатиме другите земји, ние ќе ги тарифираме и оданочуваме странските земји за да ги збогатиме нашите граѓани“, рече Трамп.
Но, царини ги плаќа земјата увозник. Со други зборови, Американците, а не Канаѓаните, би платиле дополнителни даноци на американската влада за купување канадски стоки.
Коментарите на Трамп доцна во ноќта предизвикаа итен одговор од владата на Трудо.
„Ништо од ова не треба да изненадува. Едно нешто што го научивме е дека претседателот Трамп, во моменти, може да биде непредвидлив“, изјави канадскиот министер за финансии Доминик Лебланк.
„Ги потрошивме последните неколку недели подготвувајќи потенцијални сценарија за одговор за владата на Канада во партнерство со провинциите и канадските деловни лидери и синдикалните лидери. Така, нашата земја е апсолутно подготвена да одговори на секое од овие сценарија“.
Во гостинската колумна објавена во понеделникот наутро во Вашингтон пост, поранешната министерка за финансии и кандидат за лидерство на либералите, Кристија Фриланд ги предупреди Американците дека Канада ќе возврати на царините на Трамп.
„Заканите нема да функционираат. Нема да ја влошуваме ситуацијата, но нема да отстапиме“, напиша Фриланд. „Ако не удрите, ќе возвратиме – и нашите удари ќе бидат прецизно насочени. Ние сме помали од вас, сигурно, но влогот за нас е неизмерно поголем. Не се сомневајте во нашата решителност“, напиша таа.
Владата на Трудо, со поддршка на сите премиери на земјата, освен Даниел Смит од Алберта, рече дека сите опции се на маса кога станува збор за одговор на каква било тарифна закана од Соединетите држави – вклучително и потенцијален извозен данок на канадски енергетски производи , како што се нафтата и гасот.
Околу 25 отсто од нафтата што Америка ја троши доаѓа од Канада.
А сепак, и покрај изјавата на Трамп во понеделникот вечерта дека е подготвен да воведе општа царина од 25 отсто за канадски стоки до 1 февруари, повеќето Канаѓани едноставно не веруваат дека тој ќе се придржува. Од анкетираните од Ипсос, 55 отсто рекле дека веруваат дека заканата на Трамп е само блеф за да се натера Канада да дејствува брзо за други прашања, како што се засилување на граничната безбедност и трошење повеќе за одбрана.
(Фото: Глобал Њуз)
