Аналитика
Извршниот директор на Тесла, Илон Маск, вели дека неговиот договор за купување на Твитер не може да се придвижи, доколку компанијата не покаже јавен доказ дека помалку од 5% од сметките на платформата за социјалните медиуми се лажни или спам.
Маск го даде коментарот како одговор на друг корисник на Твитер рано во вторникот. Тој помина голем дел од претходниот ден во разговор со извршниот директор на Твитер, Параг Агравал, кој објави серија твитови објаснувајќи ги напорите на неговата компанија да се бори со ботови и како таа постојано проценува дека помалку од 5% од сметките на Твитер се лажни.
Во својот твит во вторникот, Маск рече дека „20% лажни/спам сметки, односно 4 пати повеќе од она што Твитер тврди, а би можеле да бидат и многу повисоки. Мојата понуда се засноваше на тоа што поднесоците на Твитер се точни“. Тој додаде: „Вчера, извршниот директор на Твитер јавно одби да покаже доказ за 5%. Овој договор не може да оди напред додека тој не го стори тоа“.
Ова е најновиот напад на Маск во врска со неавтентичните сметки, проблем што тој рече дека сака да го ослободи од Твитер. Битката околу спам сметките започна минатата недела кога Маск објави на Твитер дека договорот со Твитер е во мирување во очекување на потврда на проценките на компанијата дека тие сочинуваат помалку од 5% од вкупните корисници.
Во четвртокот, Твитер објави дека ги замрзнува вработувањата, ги отфрла понудите и ги намалува трошоците. Двајца директори, исто така, ја напуштија компанијата, вклучувајќи го и нејзиниот шеф за потрошувачки производи, Кајвон Бејкпур, кој рече дека извршниот директор Параг Агравал побарал од него да си замине.
Агравал во петокот рече дека сè уште очекува продажбата на Маск да биде завршена, но дека е подготвен да продолжи да „го води и да работи на Твитер“ во случај да не се случи.
Во серија твитови од завчера, Агравал истакна како Твитер се бори против спам и одредува колкав процент од сметките се лажни на платформата, истакнувајќи дека компанијата не може јавно да открие конкретни детали за процесот бидејќи делумно се потпира на приватните кориснички информации. „Ние споделивме преглед на процесот на проценка со Илон пред една недела и со нетрпение очекуваме да го продолжиме разговорот со него и со сите вас“, напиша Агравал.
Маск одговори на твитот на Агравал, велејќи: „Па, како огласувачите знаат што добиваат за своите пари? Ова е фундаментално за финансиското здравје на Твитер“.
На Самитот All In, Маск даде најсилно навестување досега дека би сакал да плати помалку за Твитер од понудата од 44 милијарди долари што ја направи минатиот месец. Коментарите на Маск веројатно ќе ги зајакнат теориите на аналитичарите дека милијардерот или сака да излезе од договорот или да ја купи компанијата по поевтина цена. Неговиот твит во вторникот дојде како одговор на еден од новинската страница на Тесла, во кој се шпекулира дека Маск „можеби бара подобар договор со Твитер бидејќи 44 милијарди долари изгледаат премногу високи“.
„Акциите на Twitter повторно ќе бидат под притисок утрово, бидејќи шансите за постигнување договор сега не изгледаат добро“, рече аналитичарот на Wedbush Securities, Ден Ајвс, кој ги покрива и Твитер и Тесла, во истражувачката белешка. Тој процени дека има „60%+ шанси“ Маск да се повлече од договорот и да ја плати таксата за раскинување од 1 милијарда долари.
Акциите на Твитер ги загубија сите свои добивки откако Илон Маск минатиот месец откри дека купил 9% од акциите во компанијата. Акциите паднаа за 8% во понеделникот на 37,39 долари, паѓајќи под цената на затворањето од 39,31 долари на 1 април, последната трговска сесија пред Маск да ја открие својата малцинска сопственост на Твитер. Инвеститорите ги отфрлаат акциите поради загриженоста дека Маск ќе се откаже од договорот кон крајот на април за купување на Твитер за 44 милијарди долари или 54,20 долари по акција.
Додека акциите веќе беа во пад на почетокот на минатата недела, распродажбата се забрза откако Маск во петокот твитна дека договорот е на чекање додека не дознае повеќе детали за лажните сметки и колку тие се распространети на платформата. Мас поттикна дополнителен аларм додека тој продолжи да твита во текот на викендот за проблемите со алгоритмот на Твитер и другите „потенцијални грешки во кодот“.
Најбогатиот човек на светот ја даде понудата да го купи Твитер за 54,20 долари по акција на 14 април. Акциите на Твитер се намалија од тогаш и сега се намалени за нешто повеќе од 8%, за да се затворат на 37,39 долари во понеделник. За финансирање на аквизицијата, Маск вети дел од неговите акции на Tesla, кои паднаа за околу една третина од објавувањето на договорот.
Со континуираниот пад на акциите, Твитер сега се проценува на нешто повеќе од 29 милијарди долари, или приближно 15 милијарди долари под договорената куповна цена на Маск.
