МАКЕДОНСКИТЕ САЈБЕР ЕКСПЕРТИ КАТЕГОРИЧНИ: Не забележавме никаква комуникација со IP-адреси во Венецуела

По контроверзни избори во Венецуела, македонските хакери се повторно сензација во светот откако стигнаа обвинувања за изборни нерегуларности од државните институции. Јавниот обвинител на Венецуела, Тарек Вилијам Сааб, ја обвини лидерката на опозицијата Марија Корина Мачадо и објави дека е почната истрага за наводната нејзина вмешаност во хакирањето на системот за пренос на податоци на Националниот изборен совет од Македонија, за време на изборите во неделата, но притоа без да покаже никакви докази. Според главниот обвинител Тарек Вилијам Сааб, бил направен обид за манипулирање на резултатите, но тој не успеал.

На прес-конференција Сааб рече дека неговата канцеларија пронашла прелиминарни докази за наводен обид за саботажа на изборниот систем што доаѓа од Македонија, а зад која покрај Мачадо стоеле и „бегалците од правдата“ Лестер Толедо и Леополдо Лопез.

Ваквиот чин според обвинителот го забавил системот со кој се обработувале податоците при што двата табора објавија различни резултати со огромна разлика на изборите.

Како што објавија медиумите победник на изборите е актуелниот претседател Николас Мадуро кој е на власт веќе 11 години, додека кандидатот на опозицијата Едмундо Гонзалез Урутија освоил 44 отсто.

Опозицијата го тврди спротивното, односно дека победил токму нивниот канидат со огромна разлика од 70 проценти од избрачите што излегоа на гласачките места.

Според опозицијата, Мадуро освоил 2,75 милиони гласови, наспроти неговиот ривал, поранешниот дипломат Едмундо Гонзалез, кој имал 6,27 милиони, додека според официјалните бројки 5,15 милиони гласови отишле кај Мадуро, а 4,45 милиони кај Гонзалез.

Набљудувачите, согласно законот во Венецуела, имаат право да задржат копија од броењето на резултатите од секоја машина, но од опозицијата велат дека преку ноќ на некои набљудувачи им бил блокиран пристапот до броењето и дека резултатите не биле печатени.

Порталот „Пари“ побара размислување од македонски инженер за сајбер-безбедност за да ни објасни што конкретно се случува. Дали навистина е извршен сајбер напад од страна на македонски хакери? Или, пак, се работи за жесток политички конфликт.

-Информирани сме за обвинувањата од страна на јавниот обвинител Тарек Сааб кој изјави дека е извршен сајбер напад врз изборниот систем на Венецуела со изворни ip адреси од Македонија. Јавниот обвинител нема дадено дополнителни информации, ниту пак докази за настаните. Она што го воочивме е дека веб-сајтот е недостапен за странски посетители, вклучувајќи ја и Македонија. Не би се согласил дека се работи за извршен сајбер напад, бидејќи како што може да воочиме направена е одбрана со тоа што се блокирани странски IP адреси. На сообраќајот кој вршиме мониторинг не воочивме ниту една комуникација со ip адреси на венецуелскиот изборен систем – објасни Кристијан Ангеловски, инженер за сајбер безбедност во ЦПП УСЛУГИ ДОО Скопје.

Министерот за дигитална трансформација, Стефан Андоновски, денес истакна дека освен венецуелските наводи, „авторитарниот режим“ во Каракас не приложил никаков доказ. „Внимателно го следиме процесот“, рече Андоновски.

-Министерството не е истражен орган, но ќе се погрижиме никој да не биде обвинет во нашата земја без да имаме соодветни докази за тоа, и да не сме вклучени во внатрешно-политички битки меѓу авторитарен режим што постои со години во таа земја и опозицијата таму – додаде Андоновски.

К.М.