Аналитика
Обнова на довербата во државните институции, сузбивање на корупцијата и владеење на правото, заедно со економско заживување и подобрен животен стандард очекува јавноста од новата Влада, чиј предводник ВМРО-ДПМНЕ сето ова го вети во предизборието, а е содржина на програмата за работа. Владиниот состав кој ќе ја средува состојбата во земјава ја изгласаа 77 парламентарци, 22 беа против, додека народните избраници од Европскиот фронт ја напуштија салата пред чинот на гласањето.
Премиерот Христијан Мицкоски и неговиот тим, на граѓаните треба да им испорачаат, пред сѐ, квалитетен животен стандард и нов циклус на економски раст, со продуктивни и добро платени работни места, во амбиент во кој бизнисите „можат да цветаат“, како што вели премиерот. Проследено со стабилни јавни финансии, поддршка за конкурентен приватен сектор, поддршка за иновациите и ИКТ секторот, развиено земјоделство, функционална инфраструктура, енергетски сектор во служба на државата.
Веќе од идната година бруто домашниот производ треба да расте со стапка од три до пет проценти, буџетскиот дефицит да се сведе на ниво под три отсто, а до крајот на мандатот на оваа Влада инфлацијата би требало да е во рамка од два до 2,5 проценти годишно. Невработеноста, пак, до 2028 ќе се спушти до 7,5 проценти.
Македонија повторно ќе се промовира како поволна инвестициска дестинација, но ќе има и поддршка на лицата кои ќе се вратат од странство.
Меѓу другото, ќе има и грантови и поволни кредити за 150 илјади домаќинства за нови енергетски фасади, прозорци и врати, субвенции за сончеви колектори, топлински пумпи и фотоволтаични електрични централи…
Паралелно со тоа ќе се води организирана борба против корупцијата, законите ќе важат и ќе се применуваат еднакво за сите граѓани.
Ова е само дел од платформата 1198 на ВМРО-ДПМНЕ, која кај граѓаните високо го крена прагот на очекувањата и надевањата. Освен тоа, новиот премиер порача дека не им се потребни 100 дена, односно веднаш ќе се зафатат со работа, а првите резултати ќе се видат уште неделава.
Сето тоа ќе треба да го испорача Владата на премиерот Христијан Мицкоски, која од овој состав е со 24 члена и има 20 министерства, четири повеќе од досега. Тринаесеттиот премиер на државата, кој рече дека ова е „последната шанса да ја направиме Македонија повторно горда“, има пет заменици, од кои еден прв вицепремиер.
Тимот на 20-от владин кабинет го сочинуваат: Панче Тошковски како министер за внатрешни работи, Владо Мисајловски – одбрана, Тимчо Муцунски за надворешни работи и надворешна трговија, Гордана Кочоска Димитриеска за финансии, Александар Николоски – вицепремиер и министер за транспорт, Стефан Андоновски за информатичко општество и дигитална трансформација, Златко Перински за локална самоуправа, Сања Божиновска министерка за енергетика, рударство и минерални суровини, Цветан Трипуновски – земјоделство, шумарство и водостопанство, Весна Јаневска – образование и наука, Зоран Љутков за култура и туризам, Борко Ристовски за спорт, Љупчо Димовски – вицепремиер и министер за политички систем, Иван Стоиљковиќ вицепремиер за односи со заедниците, Шабан Салиу министер без ресор задолжен за интеграција и имплементација на декадата на Ромите, Изет Меџити – вицепремиер и министер за животна средина и просторно планирање, Арбен Фетаи вицепремиер за добро владеење и министер без ресор, Арбен Таравари – здравство, Орхан Муртезани за европски прашања, Фатмир Лимани за социјална политика, демографија и млади, Бесар Дурмиши за економија, Игор Филков – правда, Горан Минчев министер за јавна администрација.
