Аналитика
Глобалното затоплување брзо ја води планетата кон опасна иднина, предупредуваат научниците, а најтешките последици веќе се појавуваат многу порано од очекуваното. Новите меѓународни извештаи укажуваат дека светот силно заостанува во напорите за ограничување на порастот на температурата на 1,5 степени Целзиусови – цел што земјите ја поставија со Парискиот договор во 2015 година.
Иако три децении климатска акција го забавија растот на емисиите, сегашните политики се далеку од доволни. Според Обединетите нации, постојните ветувања водат кон затоплување меѓу 2,3 и 2,5 степени до крајот на векот, а доколку не се исполнат, температурата може да порасне до 2,8 или дури над 3 степени. Меѓународната агенција за енергија оцени дека целта од 1,5 степени практично е недостижна, бидејќи глобалната економија и натаму силно се потпира на фосилни горива.
Светот веќе е затоплен за околу 1,4 степени, што доведе до зачестени екстремни временски настани, вклучително и смртоносни топлотни бранови, поплави, пожари и суши ширум планетата. Климатските научници предупредуваат дека затоплување над 2 степени може да предизвика неповратни промени, како дестабилизација на ледените покривки, значително покачување на нивото на морето и губење на повеќето планински глечери.
Истражувачите истакнуваат дека последиците од порастот на температурите веќе ја преминуваат способноста на многу земји да се прилагодат, особено во региони со ограничени ресурси. Дополнителен ризик претставуваат можните повратни механизми во климатскиот систем, сушење на Амазонија, топење на арктичкиот пермафрост и други процеси што би можеле да го забрзаат загревањето.
И покрај напредокот во чистата енергија и намалените проекции за екстремно затоплување во однос на ситуацијата пред една деценија, научниците предупредуваат дека патот по кој се движи човештвото останува „исклучително опасен“. Според нив, без значително и итно глобално намалување на емисиите, затоплувањето меѓу 2 и 3 степени ќе ја направи планетата многу потешка за живеење отколку што е денес.
