Аналитика
Иднината е во електричните автомобили. Наместо да се полни бензин во резервоари, во електрични автомобили, електричната енергија се „истура“ во литиумски батерии и тука започнуваат проблемите. Литиумот е оскуден, побарувачката расте, па затоа се планираат нови рудници за литиум во Србија, БиХ, Португалија и Австрија.
Доколку се остварат предвидувањата на експертите, во следните 10 до 15 години, автомобилите со бензински мотори ќе ја доживеат судбината на диносаурусите. Едноставно, ќе исчезнат од сцената, со цел да се намалат емисиите на јаглерод диоксид и да се забави глобалното затоплување.
Производителите на автомобили како Форд, Фолксваген, БМВ, Мерцедес, Јагуар, веќе бргу лансираат модели со електрични мотори, со цел да ги заземат најдобрите можни почетни позиции за во иднина, но ограничувачки фактор се батериите, поточно литиумот.
Без литиум, нема батерии со висок капацитет и без батерии, нема електрични автомобили. Значи, логичен заклучок е дека кој и да го контролира снабдувањето со литиум во следните децении, практично ќе ја контролира и автомобилската индустрија. Како и со голем број други стратешки метали, Западот одеднаш откри дека Кина има доминантна контрола и тука. Бројни рудници за литиум во Австралија и Јужна Америка се веќе во сопственост на кинески компании, па кога сето тоа ќе се додаде, Кина е неизбежен играч.
Во изминатите триесетина години, ова не претставуваше проблем, бидејќи Западот со задоволство и го препушти на Кина “валканиот” бизнис со ископување и преработка на литиум. Сега, кога Кина стана глобален конкурент на Западот, таа идеја веќе не изгледа толку добро. Во моментов, 55 проценти од светското производство на литиум доаѓа од Австралија, проследено со Чиле со 23 проценти, Кина со 10 проценти и Аргентина со осум проценти.
