ЌЕ СЕ ЖРТВУВА ЛИ СОПСТВЕН КАПИТАЛ ЗА ОДРЖУВАЊЕ НА БИЗНИСОТ ВО КУМАНОВО?

Иако во Франција уште од многу одамна се залагаше за термините liberté, égalité, fraternité, односно слобода, еднаквост и братство, се чини дека Куманово дури сега има капацитет и волја за спроведување на истите. Таквите залагања се одразуваат и врз економските субјекти од овој регион каде разликата во топ 10 просечни плати е само 100 ЕУР. Поентата е дека компаниите обезбедуваат фер услови за своите вработени и се цени поединечниот потенцијал, а со тоа се намалува предизвикот за промена на работните места, но ваквиот тренд долгорочно може негативно да се одрази врз продуктивноста и мотивираноста на вработените. И додека процесот на изедначување на платите во Куманово трае, сепак бизнис остварувањата не се така хомогени.

Имено, според податоците на Бизнисмрежа.мк, од аспект на вкупни приходи загрижувачки е податокот дека најголемата компанија Рапид Билд изминатата пандемиска година претрпела значително намалување на реализацијата од над 47%. Во големата тројка од оваа категорија топ 10 влегуваат и познатите Екстра Меин и Бучен Козјак. Додека првата компанија успеала да го одржи само резултатот од 2019 година, втората компанија го искористила потенцијалот на пзарот за зголемување на своите приходи за дополнителни 12.8%. Исто така Бучен Козјак го бележи и најглемиот апсолутен пораст на приходи за нешто повеќе од 1 милион ЕУР. Лидер во оваа процентуална категорија е компанијата Дел Кредере, која своите приходи ги пораснала за 53.5%.

Износите се изразени во евра | Извор на податоци: БизнисМрежа.Мк

За шокот кој го доживеале кумановските компании и неспремноста за брза адаптација во вондредни услови, говори и податокот за вкупни приходи на топ 10 компании кои исплаќаат најголема плата. Имено, овој кумулатив е за 11 милиони ЕУР понизок во споредба со резултатот од 2019 година.

Од аспект пак на вкупната добивка која ја оствариле овие компании податоците се уште попоразителни ако се знае податокот дека оваа категорија има дупло помало ниво во споредба со 2019 година.

Износите се изразени во евра | Извор на податоци: БизнисМрежа.Мк

Падот на приходи кај Рапид Билд бил дополнителен катализатор на драстичен пад на приходите за неверојатни 89% или над 4.5 милиони ЕУР послаб резултат во споредба со 2019 година. Во оваа група на компании кои бележат значителни надолни движења кај остварената добивка се уште и Простор и Детоил Транспорт, со над 90% пад, како и Клечовце со пад од скоро 65%. Од друга страна кај компанијата Бучен Козјак генериран е пораст на добивка од 110%, додека лидер според апсолутни вредности е Екстра Меин кои се единствени со резултат над 1 милион ЕУР.

Потврда за првиот пасус од овој текст следи во продолжение, преку прикажување на просечната плата и бројот на вработени кај топ 10 компаниите од оваа категорија:

Генералниот заклучок за овие 10 компании е дека дури и на цена на сопствениот капитал, сопствениците на компаниите се грижат за своите вработени. И при драстични проблеми со тековно управување на бизнис процесите во овие 10 компании не се забележани поголеми промени во платните списоци. Интересно е што лидер според исплатена просечна плата од 32.324 денари е компанијата со најголеми финансиски проблеми Рапид Билд, додека најуспешната компанија Бучен Козјак има најниска просечна плата во оваа категорија. Дополнително, Рапид Билд е и најголемиот работодавец во Куманово со 254 вработени.

Редакција Пари