Аналитика
Комерцијална Банка оствари позитивни финансиски резултати, со шест месеци работа, добивката изнесува 2.844,6 милиони денари и е зголемена за 42 проценти. За споредба, во истиот период лани беше 2.003,3 милиони денари.
КАКВИ СЕ ОЧЕКУВАЊАТА НА МЕНАЏМЕНТОТ НА БАНКАТА ЗА ПЕРИОДОТ ШТО СЛЕДИ?
Без оглед на неизвесноста и влијанијата домашни и надворешни, во фокусот на Комерцијална банка ќе останат потребите на клиентите, одржувањето на квалитетот на портфолиото и изнаоѓање флексибилни решенија на барањата на клиентите, ефикасно управување со трошоците, натамошна дигитализација на процесите и модернизација на деловната мрежа.
Макроекономските услови во кои банката ќе ја остварува својата активност во текот на 2024 година ќе зависат од домашните политички случувања, како и од сѐ уште неизвесниот и непредвидлив глобален амбиент и присутните ризици предизвикани од: продолжената војна во Украина и дополнително од воениот конфликт Хамас-Израел, послабиот раст на кинеската економија како втора по големина во светот, рецесијата во Германија како наш најголем трговски партнер, понатамошното затегнување на меѓународните финансиски услови и зголемениот финансиски стрес кај високо задолжените земји. Овие фактори влијаат на економскиот раст, инфлацијата и екстерната позиција. Високото ниво на неизвесност во домашната економија и на меѓународен план упатуваат на потребата од поконзервативен пристап за тоа какви би биле очекувањата за 2024 година, при што се земени предвид проекциите објавени од Министерството за финансии, Народната банка, ММФ и Светската банка. Согласно најновите мајски проекции од НБРСМ се очекува стапката на раст на БДП за 2024 година да изнесува 2,6 %, што е во рамки и на последните прогнози објавени од Светската банка, чии очекувања се дека македонската економија ќе забележи раст на БДП од 2,5 % во 2024 година. Ваквите стапки на раст би се оствариле доколку се реализираат најавените јавни инфраструктурни проекти, како и странските и домашни инвестиции, особено во обновливи извори на енергија и во извозниот сектор.
Се очекува макроекономската стабилност да се остварува преку одржување на ценовната стабилност и стабилноста на номиналниот девизен курс на денарот во однос на еврото. Просечната годишна инфлација во 2023 година изнесуваше 9,4 %, додека за 2024 година се очекува нејзино натамошно забавување и сведување на ниво од 3,5%. Сепак, нагорните ризици околу инфлацијата сѐ уште постојат и се поврзани главно со цените на примарните производи, промените на регулираните цени, како и со политиките на страната на побарувачката и профитните маржи. Се очекува дека банкарскиот систем и натаму ќе обезбедува солидна кредитна поддршка, но малку поумерена.
