Аналитика
Високи американски и кинески претставници во Швајцарија кон крајот на оваа недела треба да ги започнат закочените трговски разговори по воведувањето на царините од страна на претседателот Доналд Трамп, соопштиjа претставници на двете земји, јави Франспрес.
Разговорите го означуваат првиот официјален јавен дијалог меѓу двете најголеми економии во светот за решавање на трговската војна што ја ескалираше Трамп кратко по неговото враќање на функцијата во јануари.
Министерот за финансии Скот Бесент и трговскиот претставник на САД (USTR) Џејмисон Грир ќе присуствуваат на разговорите во Европа во името на Соединетите Американски Држави, соопштија нивните канцеларии.
Трговските разговори, првата лична средба меѓу кинеските и американските претставници откако започна сериозното воведување на царинските мерки во март, веројатно нема да резултираат со трговски договор, изјави во вторникот министерот за финансии Скот Бесент. Но, царините достигнаа толку високо ниво што трговијата меѓу двете земји драматично се намали.
Бесент изјави за Фокс њуз дека делегациите ќе одржат состаноци во сабота и недела со цел да се постават темелите за идните преговори. „Ќе се договориме за што ќе разговараме. Моето чувство е дека ова ќе биде за деескалација, а не за големиот трговски договор“, изјави Бесент за емисијата „The Ingraham Angle“. „Мораме да деескалираме пред да можеме да продолжиме напред“, додаде тој.
Вицепремиерот Хе Лифенг ќе присуствува за Пекинг, објави кинеското Министерство за надворешни работи. „Вицепремиерот Хе, како водечко лице од Кина за економски и трговски прашања меѓу Кина и САД, ќе се сретне со водечкото лице од САД, секретарот за финансии Скот Бесент“, соопшти кинеското Министерство за надворешни работи.
Откако Трамп се врати во Белата куќа во јануари, неговата администрација воведе нови царини во вкупен износ од 145 проценти на стоки од Кина, со некои мерки специфични за секторот наредени покрај нив. Пекинг возврати со воведување 125% царини на американскиот увоз во Кина, заедно со поцелни мерки.
Царините „очи за око“ ги оставија двете нации со неверојатно високи царини кои ги шокираа финансиските пазари и наводно предизвикаа нагло забавување на билатералната трговија.
Тоа значи дека бизнисите во Кина и САД наскоро ќе се соочат со тешка одлука: да платат царина што повеќе од двојно ја зголемува цената на увезената стока или целосно да престанат да ја продаваат. Тоа значи дека потрошувачите се на неколку недели од тоа да доживеат повисоки цени и сериозни потешкотии.
Казнените царини веќе им наштетија на двете економии. Американската економија се врати во рикверц во првиот квартал, нејзино прво намалување за три години, бидејќи бизнисите складираа стока во очекување на царините на Трамп за „Денот на ослободувањето“, кои започнаа во вториот квартал, јавува Си Ен Ен. Во меѓувреме, фабричката активност во Кина се намали со најбрзо темпо за 16 месеци во април, а се очекува владата да инјектира во економијата повеќе стимулативни мерки.
Глобалните економисти во Меѓународниот монетарен фонд, ОЕЦД и Светската банка предвидоа дека трговската војна на Трамп ќе има катастрофални ефекти врз глобалната економија, драматично забавувајќи го растот во некои земји, а воедно повторно разгорувајќи ја инфлацијата. Се очекува Соединетите Американски Држави да бидат меѓу најтешко погодените економии, бидејќи другите земји, вклучително и Кина, возвраќаат со повисоки царини. Многу американски економисти и големи банки предвидуваат дека Соединетите Американски Држави би можеле да влезат во рецесија оваа година.
(Фото: NC State University)
