КАКО ЌЕ СЕ ПРЕСМЕТУВААТ ПЛАТИТЕ ВО ЈАВНИОТ СЕКТОР: ССМ за основа го бара бруто просекот, Владата го нуди минималецот

Платите во јавниот сектор ќе се зголемуваат, но дали според предлозите од синдикатите или по теркот што го нуди Владата. Впрочем, за тоа се зборува и на Економско-социјалниот совет. Примањата веќе извесно време се тема на разговор и на недоразбирања – месеци наназад се кршат копја за усогласување на платите во износ од две илјадарки, за кои во државната каса нема пари. Состојбата кулминираше со енормното зголемување на месечните приходи од 78 насто за 1.600 функционери, кои деновиве легнаа на нивните сметки.

Оттаму и предлогот на ССМ – како основа за пресметување да се земе просечната исплатена бруто плата по вработен во претходната година. А, коефициентот на сложеност да се утврдува во три категории. Првата или категорија А би ги опфатила работниците кои се на раководни позиции и за нив се предвидени највисоките коефициенти, од 1,5 до 2,2. Во категоријата Б се стручните работници со коефициент од 1 до 1,5. Во третата В категорија се помошно стручните работници со коефициент од 0,8 до 1. Коефициентот, посочуваат, се утврдува со колективен договор.кон

Од Синдикатот појаснуваат дека на овој начин ќе се дојде до пристојно зголемување на платите, со кое нема да се потценува трудот на вработените.

Секако, месечните износи се пресметуваат и со додатоците кои произлегуваат од сменското, од двократното, од ноќното работење, дежурствата, од работните активности за време на празници, викенд, неработни денови…, како и од годините стаж.

Владата, пак, ја предлага формулата според која основната бруто плата е сочинета од минималната бруто плата плус бројот на бодови за работното место.

Динамиката би била – од први март 2024 вредноста на бодот ќе се зголемува за 20 насто од процентот на пораст на минималната бруто плата, од први март 2025 за 40, од први март 2026 за 60, од први март 2027 за 80 и од први март 2028 – за 100 насто.

Познато е, со минатогодишните мартовски измени на Законот за минимална плата се воспостави методологијата за утврдување на најниските примања. Или, секој март износот ќе се усогласува според податоците на статистиката, и тоа по 50 проценти од порастот на  трошоците за живот и од зголемувањето на просечната плата од изминатата година.

Зголемувањето ќе се одвива еднаш годишно, реагираат синдикатите и тоа на пониска основа, затоа и инсистираат на просечната бруто плата како основа за пресметка. Доколку се опстои на владиниот предлог, велат, вредноста на платите ќе расте по 1,5 денари, што за работното место со најмногу бодови ќе значи плус околу 800 денари во бруто износ, а на тие со најмали примања околу стотина денари.

Овој предлог е сличен на законскиот акт за платите што важи за вработените во Собранието, но треба да се достигне во период од пет години.