Аналитика
Работодавачите имаат уште петнаесеттина дена за исплата на регресот за годишен одмор. Законскиот рок истекува заедно со последниот ден од годинава. Ова е право на секој вработен кој зад себе има минимум шест месеци непрекинат стаж. Неважно дали на определено или неопределено време.
На овие пари сигурно може да сметаат вработените од јавниот секор. За нив, во владино-синдикалните преговори се утврди износ од десет илади денари. На дел од нив оваа сума веќе им е исплатена – здравство, образование, јавни претпријатија. А, од следната година че добиваат и повеќе, висината на К-15 ќе биде 30 отсто од просечната плата, или околу 13.000 денари.
Иако Законот е дециден, дека никој ни од јавниот ни од приватниот сектор не е ослободен од оваа давачка, досегашната практика покажува низа обиди да се забошоти обврската кон вработените. Во текот на минатата година, на пример, до ССМ стигнале повеќе од три илјади поплаки за воопшто неисплатен или фиктивно исплатен К-1. Односно, многумина се сочиле со барањата – парите легнати на сметките, во кеш да му се вратат на работодавачот.
Оваа појава е присутна и покрај предвидените казни, кои се движат до четири илјади евра. Од кои до две до три илјади евра за фирмата и од 500 до илјада евра за одговорното лице. За оние, пак, кои симулираат исплата, Законот предвидува затворска казна од три месеци до една година.
Оттаму, сите кои ќе наидат на овој проблем, треба да се обратат до Државниот инспекторат за труд, кој го контролира процесот на исплатата – по пристигната пријава или самоиницијативно. Исто така, своите права вработените можат да ги заштитат и преку судска постапка.
Инаку, минималниот износ за К-15 е околу 14.000 денари, што претставува 40 проценти од просечната плата во последното тромесечје. Максимумот, пак, е колку и просечната плата, која според септемвриската статистика е на нивото од 37.876 денари.
