Иран одреди нови правила за минување низ Ормускиот теснец

Иран извести дека само бродови кои не учествуваат или не поддржуваат акти на агресија против земјата можат да користат „безбеден премин“ низ Ормускиот теснец, условено со координација со иранските власти. Писмото, испратено до Советот за безбедност на Обединетите нации и до Меѓународната поморска организација (ММО), истакнува дека сите бродови мора да ги почитуваат пропишаните безбедносни мерки.

Според пишувањата на Ројтерс и на Фајненшл Тајм, овие нови правила доаѓаат во време кога војната меѓу САД и Израел против Иран го блокираше приближно една петтина од светските залихи на нафта и течен природен гас што поминуваат низ теснецот, предизвикувајќи прекини во глобалните испораки.

Во писмото се наведува дека бродовите, опремата и имотот на САД, Израел и другите учесници во агресијата не се квалификуваат за „ненепријателски“ премин. Исто така, Иран потенцира дека презел неопходни и пропорционални мерки за да спречи користење на теснецот за непријателски операции против земјата.

Иако Иран не даде детални инструкции за конкретни регулативи што бродовите треба да ги следат, во соопштението се нагласува дека минувањето е можно само ако се координира со надлежните ирански органи. Нормално, преку Ормускиот теснец минуваат околу една петтина од светските залихи на нафта и течен природен гас, што го прави теснецот критичен за глобалните енергетски пазари.

(Фото: Wikimedia Commons)