ЧИТАМЕ: ВОЛАС Д. ВОТЛС – НАУКА ЗА СТЕКНУВАЊЕ БОГАТСТВО | Дел 2/4

Дали можноста е монополизирана?

Ниту еден човек не останува сиромашен поради тоа што му била одземена можноста да се збогати, поради тоа што други луѓе го монополизирале богатството и ставиле ограда околу него. Можеби сте исклучени од одредени гранки на деловното работење, но за вас се отворени други можности. Веројатно би било тешко да управувате со некој од големите железнички системи; тоа поле е прилично монополизирано.

Но, бизнисот со електрична железница сè уште е во рана фаза и нуди многу простор за претприемништво; покрај тоа, за само неколку години, воздушниот сообраќај и транспорт ќе станат голема индустрија и сите нејзини гранки ќе овозможат вработување на стотици илјади, можеби и милиони луѓе. Зошто да не го насочите вашето внимание кон развојот на воздушниот транспорт, наместо да се натпреварувате со Џ. Џ. Хил и други за шанса во светот на железницата?

Сосем е точно дека ако сте работник во челичната индустрија, веројатноста да станете сопственик на фабриката во која работите е многу мала; но исто така е точно дека ако започнете да дејствувате на одреден начин, наскоро може да ја напуштите работата во челичната индустрија; можете да купите фарма од четири до шеснаесет хектари и да отпочнете бизнис како производител на прехранбени производи.

Ова време нуди големи можности за луѓе што би живееле на мали земјени површини и интензивно би ги култивирале истите; тие луѓе сигурно ќе се збогатат. Можеби ќе речете дека за вас е невозможно да купите земјата, но јас ќе ви докажам дека тоа не е невозможно и дека сигурно можете да купте фарма доколку почнете да дејствувате на одреден начин.

Во различни периоди, бранот на можности се упатува во различни насоки, зависно од потребите на целината и конкретната достигната фаза на општествена еволуција. Во моментов, во Америка, бранот се насочува кон земјоделие и обединетите индустрии и професии. Денес, поголеми се можностите за земјоделецот во неговото поле на работа, отколку за работникот во фабрика во неговото поле. Поголема е можноста за деловниот човек кој го снабдува земјоделецот отколку за оној кој го снабдува работникот во фабриката; поголема е можноста за професионалцот кој врши услуги за земјоделецот отколку за оној кој ѝ служи на работничката класа.

Има многу можности за оној кој ќе ја следи плимата, наместо да се обидува да плива спротиводно.

Фабричките работници, без разлика дали како поединци или како класа, не се лишени од можност. Работниците не се „угнетувани“ од нивните претпоставени; нив не ги „мелат“ трустовите и комбинациите на капитал. Како класа, тие се таму каде што се затоа што не дејствуваат на одреден начин. Ако работниците во Америка одлучат да го сторат тоа, би можеле да го следат примерот на нивните браќа во Белгија и други земји и да основаат одлични стоковни куќи и кооперативни индустрии; би можеле да избираат луѓе од својата класа за раководни функции и да носат закони во корист на развојот на ваквите задружни индустрии; на тој начин за неколку години би можеле да заземат значаен дел од индустриското поле.

Прочитај и: НАУКА ЗА СТЕКНУВАЊЕ БОГАТСТВО | Дел 3/4

Прочитај и: НАУКА ЗА СТЕКНУВАЊЕ БОГАТСТВО | Дел 4/4

Книгата можете да ја најдете во Книготека Икона на Максим Горки бр 17, Ул Македонија бр 24 и во ТЦ Рамстор Мол