Аналитика
„Не ја менуваме нашата мисија, само ја менуваме патеката. Јас сум со вас и пред вас – и нема да ве водам таму каде што не би одел сам“ – им порача Зоран Витанов на членовите на Лајконет Македонија. Во поопширната вибер порака појаснува дека веќе се работи на пронаоѓање одржлив, етички и профитабилен бизнис модел „каде што повторно ќе можеме да работиме со чиста совест и гордост на идејата која плени: здружена заедница на трговци и купувачи“. Воедно, повикува да не се обвинуваат меѓусебно, туку да ги разгледаат можностите и да поведат заедничка постапка за заштита на „сите маркетери“.
Откако странските медиуми минатата недела известија дека банкротот е неизбежен за MyWorld International AG, внимението е насочено и кон Витанов, иако Мај Ворлд Македонија е под раководство на Радован Витошевиќ. Познато е, Витанов ја предводи Лајконет Македонија и е долгогодишен претставник на Лајконет Аустриа ГмбХ, кој е засегнат од стечајот. А, во нејзини рамки е и Лајконет Македонија.
Пари ги побара и Витошевиќ и Витанов. На повикот одговори само Витанов, кој нагласи дека е оштетен и дека ќе покрене соодветна правна постапка. Својата позиција во целиот случај едноставно ја објасни:
„Корисник сум на на апликацијата којашто бесплатно се инсталира и враќа пари на секое купување во четириесет и кусур земји. И бидејќи ми се допаѓа, можам освен MyWorld член да станам и Lyconet член, и едното и другото е бесплатно. Но, кога правам моја куповна заедница, кога моите купувачи пазарат и штедат, ние Lyconet членовите од тоа добиваме провизија. Ние сме корисници на компанијата. Некој направил поголема мрежа, некој помала. Но, немаме ингеренции да зборуваме во име на компанијата. Луѓето мене ме поистоветуваат со компанијата, затоа што направив голема куповна заедница, но немам увид во книгите и не знам што се случува. Јас сум дистрибутер на програмата и на платформата, но не сум во менаџментот“.
Во обраќањето до нив наведува дека актуелните случувања се последица од лошо менаџирање:
„Сите знаеме дека во последниот период компанијата влезе во финансиски проблеми поради лошо и неодговорно, а според првите индикации, можеби и криминално управување од страна на поединци во менаџментот.
Сега управата нуди нова платформа, но со услов да уплатиме 500 USDT кои ќе бидат замрзнати една година, со ветување за 150% поврат и кариерни бонуси од структурата. Симулирав ако 20% од мојот тим на активни маркетери со месечна нарачка уплатат по 500 долари, јас би заработил над 50.000 евра за еден месец!
Но! Моделот не се базира на реален шопинг, туку на уплати од луѓе. И тоа е суштинската разлика. Јас како ваш лидер не можам и нема да влезам во проект што нема реална економска основа и кој е зависен од внес на свежи пари наместо од задоволни купувачи. Тоа е ризик, како финансиски, така и етички“.
Витанов, како што наведува, по 14 години искуство тврди дека нетворк маркетингот е најхуманиот бизнис концепт, а моделот – да заработуваш процент од сè на база на препораки е генијален и издржан. Но, во случајот, тој и маркетерите од кор тимот (К6+) се сметаат за оштетени и се во „интензивни консултации со економисти и правници“. Како можни правни теми ги посочува: обезвреднување на компанијата и оштетување како малцински акционери; исплата на cashback и кариерни провизии за последните месеци; рефундација на картите за елитниот семинар; рефундација на пакети со шопинг поени (Елитен клуб, Аватар, Балансна програма, итн).
Притоа цитира еден од маркетерите со постигнат К6, кој ја дава и „формулата за загуби“: (вложено време) × (вложени финансии) × (можни заработки доколку се беше во ред) = загуба. И укажува – „Најмногу губат оние што најмногу постигнале”.
Во резимето и идните чекори, Витанов пишува дека во тек е собирање информации за поведување постапка за заштита на сите маркетери. Исто така, нагласува дека добрата страна во целата приказна се маркетерите, односно мрежата. Притоа, вели, најзначајна е идејата – да се заработува додека целиот свет пазарува, помагајќи им на потрошувачите да добијат најповолни цени, а на трговците нови и лојални купувачи.
„Оттука, веќе размислувам за отворање на наш бизнис со истата идеја, но базиран на шопинг и аванси исклучиво условени со веќе реализирани купувања. Бизнис планот покажа голема профитабилност, што не ме изненади. Деновиве собирам понуди од софтверски компании за изработка на апликација, CRM и веб-страна. Кога ќе ги имаме сите бројки и ако бројките се охрабрувачки, ќе бидете поканети да се вклучите и како со-основачи“, стои во обраќањето на Витанов кое завршува со констатација и со прашање: „Всушност, нашиот тим го воздигна овој бизнис. Зошто да не биде и бизнисот наш?“.
M.A.
Преземањето на авторски содржини (текстови и фотографии) од оваа страница е дозволено само делумно и важат условите опишани на следниот линк.
MyWorld Македонија: Формално жива фирма со драматично променливи показатели
