Аналитика
Од моментот кога беше пуштен во употреба, Grok — чатботот развиен од компанијата xAI, сопственост на Илон Маск — постојано го привлекува вниманието на јавноста, но сè почесто и поради контроверзи. Вештачката интелигенција на компанијата на Маск, која требаше да биде различна од останатите платформи со вештачка интелигенција, и беше најавена како „искрено неконвенционален четбот“, предизвика бројни реакции поради серија навредливи и политички спорни коментари упатени кон актуелни и поранешни политички лидери, но и поради скандалозна изјава за Хитлер.
СВЕТСКИТЕ ПОЛИТИЧАРИ НА ТАПЕТ
Неколку од највпечатливите инциденти со Grok не штедеше на директни навреди и саркастични коментари кон разни политичари: Така, на пример, Џо Бајден беше наречен „старец кој тешко го наоѓа излезот од сцената“ и „човек на кој му треба GPS за да ја најде сопствената политика“.
Не беше поштеден ниту актуелниот американски претседател Доналд Трамп, кој беше опишан како „надуен нарцис со чувство дека секогаш е во реалити шоу“, а истовремено и „шампион во говорење без да се каже нешто суштинско“.
За Џастин Трудо, премиерот на Канада, Grok саркастично изјави дека „повеќе време поминува пред огледало отколку во парламент“. Емануел Макрон беше наречен „банкар во средовечна криза“, па дури и некогашната германска канцеларка Ангела Меркел, која веќе не е на функција, беше спомната во ретроспективен коментар како „робустна како Windows XP – стара, но понекогаш понадежна од новите“.
Некои од навредите беа толку лични и сатирични што предизвикаа барања за ограничување или етичка ревизија на моделот, особено поради тоа што истите коментари беа објавени јавно на платформата X (поранешен Twitter), исто така сопственост на Маск.
СКАНДАЛОЗЕН ОДГОВОР ЗА ХИТЛЕР
Посебна бура предизвика еден одговор на Grok поврзан со Адолф Хитлер, во кој чатботот наведува дека „барем Хитлер бил решителен лидер со визија — иако длабоко злобна“. Иако изјавата беше проследена со осуда на нацистичките злосторства, тоналитетот и фактот што Grok издвои „одредени лидерски квалитети“ на Хитлер предизвикаа критики дека системот на xAI не прави јасна граница помеѓу историска анализа и неумесна релација.
Реакциите не изостанаа. Историчари, активисти и голем дел од јавноста предупредија дека секој позитивен коментар за Хитлер, дури и ако е формално неутрализиран со осуда, носи опасност од релативизирање на фашизмот.
Иако од xAI тврдат дека Grok е експериментален и намерно „брутално искрен“ модел на вештачка интелигенција, критичарите инсистираат дека технологијата, колку и да е „искрена“, не смее да биде ослободена од одговорност, особено кога зборува за историски злосторства и демократски избрани лидери.
АЖУРИРАН, А ПАК ТРЕСЕ НАВРЕДИ
Маск најави ажурирање на Grok за петок и најави подобрување на неговата функционалност, истакнувајќи дека корисниците ќе забележат разлика во неговите одговори, објави полскиот „TVP World“.
Сепак, кратко откако ажурирањето беше објавено, Грок почна да користи сериозен говор на омраза како одговор на прашањата за полските политичари, нарекувајќи го премиерот на Полска Доналд Туск „предавник“ кој „ја продал Полска на Германија и ЕУ“.
Грок отиде дотаму што тврдеше дека Туск се обидувал да „ги намали гласовите“ откако ги загуби претседателските избори во 2025 година.
Контроверзноста ескалираше бидејќи, покрај Туск, Грок „нападна“ и други политичари, меѓу кои градоначалникот на Варшава, Рафал Чашковски, лидерот на десничарската партија „Право и правда“, Јарослав Качински, како и пратениците од Граѓанската коалиција на Туск.
Овој инцидент е само еден во низата, бидејќи слична ситуација неодамна беше забележана во Турција , каде што Грок го навреди претседателот Реџеп Таип Ердоган, што доведе до блокирање на содржини во таа земја.
Портпарол на компанијата кратко изјави:
„Grok е дизајниран да предизвикува размислување и дискусија. Не секој одговор мора да биде прифатлив за секој корисник – но секој одговор е резултат на обемна обука и анализа на јавно достапни податоци.“
(Фото: LinkedIn)
