Аналитика
Понекогаш луѓето се инспирираат од холивудските филмови и кога планираат да извршат грабеж. Во неодамнешен инцидент што се случил во американскиот град Сиетл, крадци провалиле во локалното кафуле Seattle Coffee Gear, направиле дупка во ѕидот од бањата преку која влегле во соседната продавница и украле 436 iPhone-и вредни околу 500.000 долари.
Според извештајот на локалниот информативен канал на Сиетл, King 5 News, крадците го заобиколиле безбедносниот систем на Apple Store користејќи го соседното кафуле. Тие влегле во продавницата преку бања, се додава во извештајот. И двете продавници се лоцирани во локалниот трговски центар Алдервуд.
По инцидентот, менаџерот на кафулето Ерик Маркс, добил повик во врска со оваа кражба. Откако бил потврден од полицијата, тој дознал како неговата продавница се користи за пристап до Apple Store. Тој го објави инцидентот на Твитер со слика од тунелот што провалниците го создадоа во бањата на Apple Store. „Двајца мажи упаднаа во една од нашите малопродажни локации. Зошто? Да направат дупка во ѕидот на нашата бања за да пристапат до продавницата на Apple во соседството и да украдат iPhone-и во вредност од 500 илјади долари“, напиша тој на Твитер.
Се чини дека крадците прецизно го проучувале распоредот на трговскиот центар и со хируршка прецизност го планирале својот голем грабеж. Иако полицијата ги има добиено снимките од видео-надзорот на трговскиот цента, тие остануваат необјавени поради тековната истрага.
Со оглед на тоа што трговскиот центар Алдервуд е затворен за ноќ, а нема вработени чувари во продавницата на Apple, крадците го исполнија својот план до совршенство. Портпаролот на трговскиот центар рече дека тие тесно соработуваат со полицијата за да ги изведат виновниците пред лицето на правдата, додека Apple допрва треба да ја коментира ситуацијата.
Со оглед на тоа што iPhone-ите неодамна чинат цело богатство – iPhone 14 започнува од 699 долари – грабежот би можел многу да им се исплати на сторителите, бидејќи најновите модели на телефонот се многу барани на црните пазари.
Работата на провалниците беше олеснета со фактот што продавниците на Apple обично немаат сопствено обезбедување и мора да се потпрат на трговските центри во кои се наоѓаат нивните продавници за да останат безбедни.
