Аналитика
Шпанската полиција ја истражува ненадејната смрт на основачот на империјата за облека Манго, Исак Андик, како можно убиство, а неговиот син е клучен осомничен, објавија шпанските медиуми.
Во мај годинава шпанските власти повторно ја отворија истрагата за смртта на основачот на модната империја Манго во планинска несреќа минатиот декември. Исак Андик, 71, почина откако се лизнал од карпа од 150 метри додека планинарел со својот син Џонатан во пештерите Монсерат во близина на Барселона.
Како единствен сведок, Џонатан Андик, 43, тогаш бил испрашуван двапати за инцидентот, кој полицијата сè уште го смета за несреќа. Се вели дека истражителите ја испрашувале и партнерката на модниот тајкун, Естефанија Кнут – која била меѓу последните луѓе што го виделе жив – неговиот син, возачот и локален полицаец кој присуствувал на местото на настанот.
Случајот тогаш бил привремено архивиран бидејќи судијата не пронашол докази што укажуваат на постоење на кривично дело.
71-годишниот Андик, кој е основач на една од најголемите модни групи во Европа, смртно страдал, паѓајќи во провалија додека планинарел во планините надвор од Барселона во декември минатата година, предизвикувајќи голем шок.
Полицијата во североисточниот регион на Каталонија сега ја префрли својата истрага од несреќа на можно убиство фокусирано на неговиот син Џонатан Андик, објави весникот Ел Паис, повикувајќи се на „различни извори запознаени со истрагата“.
Џонатан, кој бил единственото лице со својот татко во времето на инцидентот, дал „неконзистентно“ сведоштво во две изјави што „го поттикнало сомневањето“, објави Ел Паис.
„Сведокот си противречел себеси, оставил сиви зони и опишал настани што не се совпаѓале“ со увидот на каталонската полиција на местото на настанот во планините Монтсерат, додаде весникот.
Друго сведочење на Естефанија Кнут, професионална голферка која беше партнерка на Исак Андик, ги истакна „лошите односи меѓу таткото и синот“, објави Ел Паис.
Весникот Ла Вангуардија од Барселона, исто така, повикувајќи се на „извори запознаени со истрагата“, објави дека истражниот судија формално го променил статусот на Џонатан Андик од сведок во осомничен кон крајот на септември и дека полицијата ја пребарува содржината на неговиот мобилен телефон.
Семејството „е уверено дека овој процес ќе заврши што е можно поскоро и дека невиноста на Џонатан Андик ќе биде докажана“, според нивните портпароли цитирани од „Ел Паис“.
Каталонската полиција не беше достапна за коментар.
Исак Андик Ермај беше турско-шпански бизнисмен. Во 1984 година, тој и неговиот брат Нахман ја основаа компанијата за малопродажба на облека „Манго“. Како најголем акционер во Манго, богатството на Андиќ се проценува на 4,5 милијарди американски долари во времето на неговата смрт, што го прави најбогатиот човек во Каталонија и еден од најбогатите во Шпанија.
Андик ја отвори својата прва продавница во Барселона во 1984 година. Неговиот моден бренд Манго брзо се прошири низ Шпанија и стана една од водечките модни групи во светот. Компанијата е присутна на повеќе од 120 пазари со повеќе од 16.400 вработени низ целиот свет, според нејзината веб-страница.
