Аналитика
Ги носат закачени на своите чанти, го облекуваат во дизајнерска облека, ги чешлаат, шминкаат, па дури и тетовираат. Со нив во јавност се појавуваат светски поп ѕвезди, актерки, инфлуенсери со милиони следачи. Побарувачката по нив континуирано расте, а компанијата која ги произведува и продава, остварува профит кој се мери во милијарди долари. Тоа се Лабубу – куклите, најновото колекционерско лудило, кое полека го освојува светот.
Лабубу-куклите се бренд на колекционерски дизајнерски кадифени играчки чудовишта-џуџиња создадени од дизајнерот од Хонг Конг со кинеско-белгиско потекло Касинг Лунг, кои се продаваат ексклузивно во ланецот проодавници на кинеската фирма Поп Март.
Лабубу се опишуваат како кукли со разигран, но малку жесток изглед, со тркалезни, крзнени тела, широко отворени очи, зашилени уши и девет остри заби кои формираат палава насмевка. Освен самата Лабубу, и други фигури припаѓаат на „племето“ наречено „Чудовишта“, вклучувајќи ги ликовите Мококо, Пато, Спуки, Тикоко (дечкото на Лабубу „со скелетен изглед“) и Зимомо (водачот на Чудовиштата, со шилеста опашка). Куклите се произведуваат со различни изгледи.
ПОЛА МИЛИЈАРДА ДОЛАРИ ПРОФИТ ОД „ЧУДОВИШТАТА“- ГОДИШНО
Лабубу започна како лик дизајниран од Касинг Лунг (роден 1972 година), уметник роден во Хонг Конг, израснат во Утрехт, Холандија, кој подоцна се преселил во Антверпен, Белгија. Лабубу беше дел од серијата приказни на Лунг „Чудовиштата“, која беше под влијание на нордискиот фолклор и митологија од приказните кои уметникот ги слушал во детството.
Лабубу за прв пат беше претставен во 2015 година со фигури „Чудовишта“ произведени од компанијата How2Work, но, играчката доби глобална популарност во 2019 година по соработката со Pop Mart. Ова партнерство ја зголеми популарноста на Лабубу меѓу колекционерите.
Лабубу е „мало чудовиште со високи, зашилени уши, назабени заби“ и „палава“ насмевка, според веб-страницата на Поп Март.
Поп Март продава стотици различни верзии на Лабубу – кои варираат по боја и ниво на реткост – и фановите не знаат која ја купиле сè додека не ја отпакуваат кутијата, слично како запечатен пакет Покемон-сликички или сликички со популарни фудбалери. Повеќе од милион видеа на TikTok ги споменуваат морничавите мали чудовишта, а тие често се распродаваат за неколку минути.
Обожавателите се движат од возрасни љубители на модата и колекционери на играчки до родители кои купуваат чудно морничави кукли за своите мали деца. Тие може да стојат во редици во продавниците на Pop Mart и автоматите со часови, дури и да патуваат во странство за да купат Лабубу-кукла. Некои Labubu се продаваат за стотици, па дури и илјадници долари на пазари за препродажба како StockX или eBay.
Pop Mart оствари околу 13,04 милијарди јуани (1,8 милијарди долари) во глобалните приходи во 2024 година, според најновото соопштение за годишните резултати на компанијата. Тоа вклучуваше еквивалент на приближно 460 милиони долари профит, се вели во соопштението.
Околу 423 милиони долари од глобалните приходи на компанијата дојдоа само од куклите Labubu, вели Емили Броу, раководител на лиценцирање на интелектуална сопственост на Pop Mart за Америка. Тоа е зголемување од 729% во однос на 2023 година, додава таа.
„Забележавме неверојатен раст на приходите и интересот низ целата наша интелектуална сопственост“, вели Броу во интервју за Си Ен Би Си. „Лабубу сигурно достигна астрономски бројки минатата година.“
Еве како Лабубу се претвори од едноставна колекционерска играчка во вирална, профитабилна сензација.
КАКО НАСТАНАЛЕ ЛАБУБУ-КУКЛИТЕ?
Поп Март е основан во 2010 година како мала продавница за разни производи во Пекинг, Кина. Неговиот основач, Ванг Нинг – сега 38-годишен – имал дарба за малопродажба како студент по рекламирање на колеџ, каде што продавал додатоци на своите соученици, според Блумберг.
Бизнисот постојано растел, отворајќи уште една продавница на мало во трговски центар во 2011 година и онлајн продавница во 2016 година. Поп Март редовно соработувал со уметници за дизајнирање и создавање различни играчки и фигурини, а во 2019 година склучил таков договор со уметникот Касинг Лунг, кој илустрирал серија сликовници наречена „Чудовиштата“.
Лабубу е лик од „Чудовиштата“, а првиот бран кукли Лабубу на Поп Март „го сруши рекордот за продажба на [бизнисот] во категоријата уметнички играчки“, според веб-страницата на компанијата. Една година подоцна, Поп Март започна да се тргува на берза во Хонг Конг со проценка од 6,9 милијарди долари, ставајќи ја компанијата во дофат на меѓународни производители на играчки како Мател и Хасбро.
Во 2023 година, Поп Март започна со продажба на верзии на Лабубу како приврзоци за клучеви. Потоа, во април 2024 година, Лалиса „Лиса“ Манобан, членка на К-поп бендот Блекпинк, беше забележана со Лабубу на нејзината чанта како амајлија за на торба.
Таа несвесно започна ново модно лудило, бидејќи луѓето се нафрлија за да си го купат својот приврзок во форма на играчка чудовиште – брзо претворајќи ги куклите на Поп Март во моден додаток и симбол на општествен статус. Познати личности како Лицо и милијардерката Ријана ставија Лабубу-кукли на своите чанти, дополнително популаризирајќи ја играчката.
Луѓето ги персонализираат своите кукли, давајќи им капи, „дизајнерски“ облеки, очила за сонце и свои чанти. Некои луѓе дури и ставаат вистински тетоважи на лицата на своите Лабубу. Пазарната капитализација на Поп Март сега е 43,28 милијарди долари, од понеделник попладне – далеку надминувајќи ги 6,44-те милијарди долари на Мател и 10,63 милијарди долари на Хасбро.
БИЗНИСОТ СЕ ШИРИ, ПОЧНАА ИМИТАЦИИ
Огромното мнозинство од приходите на Поп Март доаѓаат од Азија – 1,6 милијарди долари во 2024 година, вклучувајќи 1,1 милијарда долари само од континентална Кина. Сепак, Лабубу сега имаат стотици илјади обожаватели низ целиот свет, вклучувајќи 145.000 „Чудовишта“ во заедницата Лабубу на Редит, на пример.
Покрај 500-те продавници на Поп Март низ целиот свет вклучуваат повеќе од 90 малопродажни локации во Соединетите Држави, вклучувајќи и автомати за продажба, според нејзината веб-страница. Успехот на компанијата ја зголеми проценетата нето вредност на Нинг на 21,6 милијарди долари, вели Форбс.
Некои обожаватели на Лабубу велат дека нивната наклонетост кон плишените чудовишта оди многу подалеку од влијанието на славните: тие ги сакаат играчките со уникатен изглед, личностите што Ланг ги создал за нив и возбудата од обидот да добијат специфичен Лабубу за своите колекции.
Ограничената понуда на „Поп Март“ наводно довела до тепачки меѓу клиентите за Лабубу куклите. Зголемените цени за препродажба создадоа пазар за имитации на Лабубу, познати како Лафуфу, на платформи како Амазон и АлиЕкспрес.
Трендовите во модата и поп-културата не траат вечно, што значи дека куклите Лабубу би можеле да ослабат со текот на времето. Засега, Поп Март планира да продолжи да се шири меѓународно – искористувајќи ја лудоста додека постои – и да го зголемува својот список на уметници за да создава и продава повеќе ликови, вели Броу.
„Поп Март постои веќе 15 години и ние навистина градиме бренд за долговечност“, вели таа. „Додека продолжуваме да го диверзифицираме портфолиото на нашите уметници и да ги диверзифицираме начините на кои луѓето навистина можат да комуницираат со нашите ликови, ќе продолжиме со нашата мисија да ја разгоруваме страста и да донесеме радост во годините што доаѓаат.“
ФАКТОРОТ „ИЗНЕНАДУВАЊЕ“
Но, не е тајната на успехот на Лабубу куклите само нивниот “откачен“ изглед, ниту нивното промовирање како моден тренд и моден додаток од страна на популарни ликови како Ријана, Дуа Липа, Ким Кардашијан и Лиза од Блекпинк и други личности на современата поп-култура.
Што ако купувањето играчка се чувствуваше како играње лотарија? За фановите на Лабубу, производите во кутија со скриени ознаки го претвораат купувањето во игра на среќа – и возбуда.
Она што можеби најмногу ги заскокоткува умовите на кулувачите е тоа што куклите се продаваат во запечатени пакувања, па се додека не ја отворите, нема да знаете кој Лабубу- лик на кукла е внатре. Овој маркетиншки трик на производителот направи куклите Лабубу да станат колекционерски предмети кои потикнаа илјадници вирални видеа каде среќниот новопечен сопственик ја отпакува куклата, но и снимки на долги редици пред штандовите за продажба на Лабубу, па дури и тепачки во продавниците.
Колекционерските предмети во кутија со скриени ознаки како Лабубу, кои ги продава „Поп Март“ со седиште во Кина, добија на популарност, делумно благодарение на тие видеа, возбудата поттикната од недостигот и процутот на пазарот за препродажба. Некогаш само уште една новина на полиците во продавниците, тие станаа глобална опсесија – влијаејќи на тоа како луѓето трошат и се поврзуваат.
„Луѓето навистина се обединуваат околу оваа кукла“, изјави Алиша Харидасани Гупта за Мет Галовеј од „The Current“. „Создаде толку многу заедници, офлајн и онлајн“, рече таа. „Тоа е еден вид лепило што ги зближува луѓето на некој начин.“
Експертите велат дека привлечноста лежи во емоционалното искуство што го испорачуваат – спојка на изненадување, исчекување и варијабилни исходи на начин што може да се почувствува слично на коцкање, но без истите ризици. Луѓето се, едноставно, љубопитни суштества, сакаат изненадувања.
(Фото: CBS)
