Аналитика
Во два дена две блок трансакции со акции на „Македонијатурист“. Познат купувач или купувачи стекнал(е) вкупно 613 акции, за кои се платени околу 75 илјади евра.
Според објавените податоци, пакетот акции од хотелско-угостителската компанија, купен во четвртокот, е вреден 2.325.000 денари или близу 38 илјади евра. Се работи за 310 акции по единечна цена од 7.500 денари. Еден ден подоцна, по истата цена е реализиран блок од 303 акции, во износ од 2.272.500 денари, односно околу 37 илјади евра.
Во период од еден месец забележани се четири блок трансакции со акциите на „Македонијатурист“. Во претходните две се купени прво 570, па потоа 1.400 акции, по цена од 7.300, односно 7.500 денари.
Во четвртокот во берзанската статистика беше заведен и блокот со 200 акции издадени од „Реплек“. Платени се 2.960.000 денари, односно над 48 илјади евра. Цената за акција е 14.800 денари.
Акциите на двете компании се интересни за инвеститорите. Освен блок трансакциите, со овие акции се тргувало и на официјалниот пазар. Во четвртокот се истргувани четири акции на скопската фармацевтска куќа по цена од 14.989 денари, при што е направен промет од 59.956 денари. Петочниот промет е 603.000 денари. Продадени се 41 акција по 14.707,32 денари.
Исто така, во текот на последниот работен ден од неделата се истргувани 1.419 акции на „Македонијатурист“, во износ од 10.828.720 денари, односно 176 илјади евра. Просечната цена за акција е 7.631,23 денари.
