Аналитика
Познат како создавач на етереум блокчејнот, Виталик Бутерин е визионер на новите технологии кои го придвижуваат Web 3.0 и поборник на децентрализацијата на интернетот. Неговата досегашна кариера открива скромно момче кое речиси случајно се пронашло себеси во крипто-заедницата, но успеал да го смени технолошкиот свет.
Виталиј „Виталик“ Бутерин е роден во Русија и таму ги поминал првите седум години од животот. Потоа со родителите се преселил во Канада, каде се школувал. Рано покажува талент за математика, технологија и криптографија, бил сметан за математички гениј па во текот на образованието бил вклучуван во програми за талентирани ученици.
Неговиот пат во светот на крипто-валутите почнал едноставно и, речиси по случајност. За биткоинот првпат слушнал од својот татко во 2011 година, кога имал само 17 години. Бидејќи во младоста се досадувал, тој поминувал многу време на интернет. Истражувајќи ги биткоин-заедниците, Бутерин дознал за една од првите публикации во светот на крипто-валутите, Bitcoin Weekly.
Идејата за децентрализација, која ќе стане темел на блокчејн технологијата, на Виталик му се јавила кога компанијата што ја создала популарната игра Warcraft интервенирала во играта така што го ослабнала ворлокот. Тој тогаш ја разбрал опасноста од централизирани сервиси, а набргу потоа почнал да го истражува биткоинот.
Првите чекори биле одлична можност за експериментирање и навлегување во тој свет, Бутерин почнал да пишува за Bitcoin Weekly за што бил плаќан за, од денешен аспект, неверојатни пет биткоини по текст, кои тогаш вределе нешто помалку од четири долара. На тој начин тој се вклучил во еден нов еко-систем, кој само што бил создаден.
Текстовите кои Виталик ги пишувал биле забележани и од други луѓе, а тој истата година станал еден од соосновачите на новата публикација Bitcoin Magazine. Ова списание, кое имало печатено издание, и кое се продавало во книжарници како Barnes&Noble, придонесло за легитимизирање на крипто-валутите и денес се смета за еден од историски најзначајните медиуми во оваа област.
Во тоа време Виталик студирал на Универзитетот Ватерло и работел како истражувач за криптографот Ијан Голдберг, а воедно бил главен автор во публикацијаја која ја основал, па не зачудува што наскоро го напуштил факултетот и целосно ѝ се посветил на новата технологија. Во следниот период, Бутерин патувал низ светот, учествувал на биткоин-конференции и на крипто-проекти какви што беа Dark Wallet и KryptoKit кои се занимавале со технологијата на крипто-паричници.
Кон крајот на 2013 година, Бутерин ја обелоденил етереум блокчејн технологијата, од многумина сметана за крипто 2.0. Веќе во јануари 2014 година амбициите на проектот напреднале па блокчејн станал основа за потенцијално бесконечна бројка на нови еволуции, кои преку смарт-договорите можат да го сменат начинот на кој функционираат апликациите, сервисите, дигиталните финансии, начинот на кој се идентификуваме на интернет и уште многу други работи.
Благодарејќи на својата работа како и на влијанието кое го стекнал во крипто-светот, Бутерин станал еден од стипендистите на основачот на PayPal, Питер Тил. Оваа стипендија во износ од 100 илјади американски долари им се доделува на млади луѓе кои ќе решат да го напуштат факултетот и да се зафатат со развивање на свои самостојни деловни потфати и таа придонесла завалидација на идејата на етереум блокчејн технологијата, која тогаш беше во својот зачеток.
Оттогаш Бутерин продолжил да работи на етереум блокчејнот, а етер станал втора по големина крипто-валута во светот, по биткоинот. Заедницата успеала да се справи и со првата поголема пречка, хакерски упад во мрежата. Низ годините етереумот вовел неколку ажурирања на блокчејнот, бил формиран Enterprise Ethereum Alliance, а се планира и големо ажурирање Ethereum 2.0. за да се подобри системот.
И покрај тоа што околу блокчејнот се формирала една поголема крипто-заедница, Бутерин, иако неволно, останал личност околу која се концентрираат новите идеи и личност која во голема мерка го насочува развојот, со што стана една од највлијателните личности во целокупниот крипто еко-систем. А бидејќи постојано зборува за преиспитувањето на крипто-валутите и за пошироките и поразновидни примени на технологијата, се проценува дека влијанието на Виталик Бутерин со време уште ќе расне.
Сепак, поради се повисоките цени на трансакциите во блокчејнот неодамна се појавија гласови кои го проблематизираат развојниот пат и начинот на кој создавачот ја замислува, а имајќи ја во предвид растечката конкуренција, и како ќе ја реализира својата визија.
Иако кариерата на Виталик Бутерин е специфична, таа покажува колку е важна визијата, размислувањето за иднината, посветеноста и вербата во сопствените идеи, како и тоа колку е значајно пресметаното превземање на ризик за да се остварат идеите.
