Аналитика
Специјална награда за успешно водење на монетарната политика во државата во услови на криза, е доделена на гувернерката на Народната банка Анита Ангеловска-Бежоска, на манифестацијата „Избор на најуспешни жени менаџери“ во организација на агенцијата “Марили“. Наградата за жена менаџер за 2022 година и статуетката „Жена водилка“, Гувернерката ги прими на Свеченост одржана вчеравечер во Охрид, во рамки на традиционалната манифестација за промовирање на 20 најуспешни жени, која 26 години по ред дава поддршка на жените и нивните заложби за водење успешен бизнис.
Во своето обраќање на Свечената манифестација, гувернерката Ангеловска-Бежоска, се осврна на значењето на родовата еднаквост како фактор којшто придонесува за подобри економски остварувања и благосостојба на населените. Прашањето на родовата активност е уште повеќе нагласено во последните години, кога се соочуваме со неколку последователно шокови, најнапред здравствената криза, енергетската криза, а потоа на почетокот на оваа година и воениот конфликт во Украина.
„Шоковите со кои се соочуваме едновремено ги погодуваат сите економии, сепак интензитет не е пропорционален. Една од карактеристиките на пандемискиот шок е дека нееднакво ги погоди економиите, секторите во рамки на одделните економиите, како и различните старосни и полови структури на населението придонесувајќи за раст на доходовната нееднаквост. Поголем беше ударот врз помалку развиените економии, секторите кои базираат на социјална интеракција, помладите возрасни групи, но и жените.“ истакна Гувернерката.
Според достапните податоци, стапката на активност на жените во текот на пандемијата се сведе на 44,7%, односно помалку од половина од работоспособното женско население е вклучено на пазарот на труд, за разлика од 67% кај мажите. Пониски стапки на активност и вработеност кај женската популација се забележуваат и во Европската Унија, регионот ЦИЈИЕ и Западен Балкан.
Осврнувајќи се на женското лидерство во период одбележан со исклучителни предизвици, гувернерката Ангеловска-Бежоска истакна дека општествата во кои има поголема родова еднаквост се сметаат за посигурни, поздрави, со помалку насилство и поголема кохезија. Притоа додаде: „Родовата еднаквост носи и огромен број на економски придобивки, како креирање на повеќе работни места, зголемена вработеност, повисоки плати, помала сиромаштија, зголемена продуктивност и конкурентност, како и адресирање на проблемот со стареење на популациите и недостиг на работна сила.“
Зголемувањето на економското учество на жените – особено во малите и средни претпријатија, кои придонесуваат со 74% во вкупната вработеност, може да доведе до намалување на сиромаштијата и да поттикне инклузивен раст, меѓу другото посочи во обраќањето гувернерката Ангеловска-Бежоска, истакнувајќи дека Народната банка во рамки на своите надлежности и натаму ќе продолжи да дава придонес за поголемата вклученост на жената во економијата, особено преку поттикнување поголема конкуренција во финансискиот систем и полесен пристап до финансии. Истовремено, фокусот на активностите ќе биде и во насока на зголемување на финансиските познавања, особено во доменот на дигиталните вештини на жените, заради ползување на поволностите коишто ги носат новите форми на финтек финансиските услуги.
