Алкалоид со донација и во Србија: Донирани 90.000 еур за пациентите со дијализа

Компанијата „Алкалоид Београд“ на Институтот за јавно здравје на Србија „Д-р Милан Јовановиќ Батут“ донираше материјал за дијализа во вредност од 90.000 евра. Целта на оваа донација е да се придонесе за подобрување на специфичните работни услови на здравствените работници во нивната благородна мисија во услови на пандемија, како и да се олесни третманот на пациентите на дијализа во Република Србија.

Донираниот материјал за дијализа е дел од Техничката спецификација на тендерските документи за централизирана јавна набавка – Материјал за дијализа спроведен од РФЗО, како нарачател за потребите на здравствените институции од Планот за вмрежување на здравствени установи во Република Србија.

Водејќи се по принципите на корпоративна општествена одговорност, како и хумано програмско-производствена посветеност, пред се насочена кон крајните корисници, од почетокот на годината Алкалоид донираше над 300.000 евра на здравствени установи и здруженија во Македонија и регионот за набавка на реагенси, лекови, апарати, средства за хигиена и за слични намени.

Покрај донации во Македонија и Србија, од почетокот на април, Алкалоид реализираше донации во Бугарија, Босна и Херцеговина и Хрватска.

„Во услови кога сите светски економии се оставени сами и се борат да ги ублажат ефектите од новата економска криза, кога загубите на работните места се неизбежен дел од таа сурова реалност, кога логистичките нарушувања ја добиваат битката за пласирање на производи, ретки се компаниите кои можат да ги надминат овие предизвици во овие тешки времиња. Ние сме свесни за тешката состојба во која се наоѓаат здравствените системи во услови на пандемија и напорите што ги прават здравствените работници за зачувување на здравјето и животот на луѓето. Како компанија чија парола е „Здравјето пред се“ во оваа прилика сакаме да им оддадеме посебна почит на медицинските сестри, здравствените работници, хигиеничарите, продавачите на пазарите и супермаркетите, фармацевтите и техничарите во аптеките, транспортерите, пекарите и на сите оние кои ги ризикуваат своите животи за нашето непречено функционирање “, рече Живко Мукаетов, извршен директор и претседател на Управниот одбор на компанијата.

Почетоците на Алкалоидите во Србија датираат од 1950 година, а според кажувањето на српските фармацевти, лековите на Алкалоид никогаш не излегле од книгата на „жолтиот регистар“ (лекови), што доволно говори за традицијата на компанијата на овој пазар.

Србија е најголемиот извозен пазар на Алкалоид АД Скопје и единственото место надвор од Македонија каде компанијата има своја компанија за производство и трговија на големо, во која работат 133 работници.

Програма за производство на Алкалоид д.о.о. Београд опфаќа 62 регистрирани производи чиј годишен обем на производство надминува 6.000.000 пакувања, а вкупното портфолио на производи на Алкалоид достапни на српскиот пазар ја надминуваат бројката од 200. ОТЦ производите, кардиолошки препарати, лекови кои делуваат на централниот нервен систем и антибиотската палета се носечка група на фармацефски производи кои Алкалоид ги продава, а од козметички производи, се разбира е најпознатиот бренд „Бекутан“.