Аналитика
И покрај сигналите од Вашингтон дека постои воља за смирување на тензиите, односно олабавување на затегнатоста која се заканува да прерасне во трговска војна меѓу Кина и САД, студен туш дојде од Пекинг, кој соопшти дека нема тековни разговори со САД за царините.
„Во моментов нема апсолутно никакви преговори за економијата и трговијата меѓу Кина и САД“, изјави портпаролот на Министерството за трговија Хе Јадонг за новинарите на мандарински, преведен од CNBC. Тој додаде дека „сите изјави“ во врска со напредокот на билатералните разговори треба да се отфрлат. „Ако САД навистина сакаат да го решат проблемот… треба да ги откажат сите еднострани мерки за Кина“, рече кинескиот претставник.
СЕГА САД БАРААТ ДЕЕСКАЛАЦИЈА НА ТРГОВСКАТА ВОЈНА СО КИНА
Американскиот министер за финансии Скот Бесент во средата изјави дека високите царини меѓу Соединетите Американски Држави и Кина не се одржливи, додека администрацијата на претседателот Доналд Трамп сигнализираше отвореност за деескалација на трговската војна меѓу двете најголеми светски економии што ги зголеми стравувањата од рецесија.
Говорејќи во Овалната соба во вторникот, Трамп рече дека е оптимист за подобрување на трговските односи со Кина, велејќи дека нивото на царините што ги наметнал „ќе се намали значително, но нема да биде нула“.
Во меѓувреме, Кина не се откажува од одмаздничките противмерки откако Трамп објави дека царините за Кина, во висина од 245% остануваат на сила, додека сите останати, освен 10% линеарни царини за сите, ги стави на 90-дневна пауза. Пекинг ги вратил авионите на Боинг што ги нарачал од САД како најнова одмазда поради царините на Трамп, изјави шефот на производителот на авиони Боинг.
Кели Ортберг рече дека два авиони веќе се вратени, а уште еден ќе следи откако трговските тензии меѓу двете земји ескалираа. Главниот извршен директор на Боинг изјави за CNBC дека уште 50 авиони треба да одат во Кина оваа година, но нивните клиенти посочија дека нема да ги достават.
Боинг е најголемиот извозник во Америка со околу 70% од продажбата на комерцијални авиони надвор од САД.
Ортберг рече дека Боинг ги проценува опциите за репродукција на 41 од веќе изградените авиони на други клиенти бидејќи има голема побарувачка од други авиокомпании.
Подоцна попладнето, Ортберг изјави на повик на инвеститори „нема ден да не сме ангажирани ниту со секретарите на кабинетот, ниту со самиот претседател Трамп во врска со трговската војна меѓу Кина и САД. Тој додаде дека е „многу се надева дека ќе дојдеме до некои преговори“.
Во средата, американскиот секретар за финансии Скот Бесент изјави на конференцијата на Меѓународниот монетарен фонд (ММФ) дека постои можност за „голема зделка“ меѓу САД и Кина за трговијата.
Запрашан за претстојниот состанок меѓу земјите, Бесент рече дека ќе биде „неверојатна можност“ да се постигне договор, доколку Кина е „сериозна“ да ја направи својата економија помалку зависна од производствениот извоз.
ПЕТТЕ СИЛНИ АДУТИ НА КИНА
Според Би Би Си, Кина има пет силни адути во трговската војна со САД која ја почна Доналд Трамп. Пред се големината, бидејќи се работи за втора по големина економија во светот, па Пекинг сериозно смета дека зголемена домашна потрошувачка би можела да олабави дел од притисокот кај кинеските извозни компании.
Втората предност е долготочното кинеско инвестирање во модернизација на производството и технологијата, што ја направило многу понезависна од порано. Кинеските производители во секоја фаза од синџирот на снабдување и дадоа на земјата повеќедецениска предност за која ќе биде потребно време да се повтори.
Таа незаменлива експертиза во синџирот на снабдување и владина поддршка ја направија Кина сериозен противник во оваа трговска војна – на некој начин, Пекинг се подготвува за тоа уште од претходниот мандат на Трамп.
Третата предност се лекциите кои Кина ги научи од претходниот мандат на Доналд Трамп, во 2018 кога тој им воспостави високи царини за соларните панели, а тоа е забрзаната експанзија кон трети пазари за сметка на американскиот. И додека порано кинескиот увоз на соја од САД сочинувал 40% од вкупниот увоз на оваа храна во Кина, илустрира Би Би Си, сега тој процент е нешто помал од 20.
Наместо САД, Кина е сега најголемиот трговски партнер за 60 земји според податоците од 2023 година – речиси двојно повеќе од САД. Најголемиот светски извозник, на крајот на 2024 година оствари рекорден суфицит од 1 трилион долари.
Четвртата предност на Кина е што сега знае што точно што го натерало Трамп да попушти за енормните царини, кои само неколку дена претходно ги фалеше како „лек за сите болки“, а тоа е остриот пад на вредноста на американските државни обврзници на берзите. Овие обврзници познати како Трезори, долго време се гледаат како безбедна инвестиција. Но, трговската војна ја разниша довербата во средствата.
Со оглед дека Трамп оттогаш навести за деескалација на трговските тензии со Кина, Пекинг сега точно знае дека пазарот на обврзници може да го потресе Трамп.
И петтата, но не помалку значајна предност на Кина во војната со царини се минералите од ретки земји, со кои Кина како најголем нивен извозник, изобилува, а кои се клучни за развој на новите технологии, но и на воената индустрија на САД.
Кина има огромни наслаги од нив, како што се диспрозиум, кој се користи во магнети во електрични возила и турбини на ветер, и итриум, кој обезбедува облога отпорна на топлина за млазни мотори.
Пекинг веќе одговори на најновите царини на Трамп со ограничување на извозот на седум ретки земји, вклучително и некои кои се неопходни за производство на чипови со вештачка интелигенција.
