Аналитика
Европскиот систем за брзо предупредување во трговијата со храна (РАСФФ) објави дека во октомври две пратки од Србија биле запрени на границата со Хрватска и Словенија. На 18 октомври на границата со Словенија е запрена пратка замрзнати капини од Србија поради недозволено количество фунгицид ипродион.
Според веб-страницата РАСФФ, во пратката капини е регистрирано 0,023 мг/кг ипродион, а дозволената количина е 0,01 мг/кг. Стоката е вратена на испраќачот.
На 25 октомври на границата со Хрватска беше запрена пратка со додатоци во исхраната со нелегални состојки. И таа пратка беше вратена.
Да потсетиме, свежите краставици наменети за словенечкиот пазар беа вратени во средината на септември, бидејќи во нив беше пронајден фунгицидот металаксил.
Во август беше вратена пратка чипс од Чачак од хрватската граница поради високо ниво на канцероген акриламид. Месец дена претходно, РАСФФ соопшти дека на граница се запрени свежите краставици од Србија наменети за словенечкиот пазар, бидејќи кај нив бил пронајден фунгицидот металаксил. Освен канцерогениот чипс и краставиците зачинети со фунгицид, Европската комисија предупреди за српски праски со опасен пестицид. Информацијата дека праските од Србија наменети за извоз во Хрватска содржат високо ниво на пестицидот хлорпирифос е објавена на веб-страницата на Европската комисија (ЕК) за брзо предупредување за храна и добиточна храна.
Од почетокот на годинава граничната контрола на ЕУ утврдила дека 10 српски производи се потенцијално опасни, додека во 2022 во 11 од нив е утврдено постоење на штетни материи. Така, првиот случај во текот на претходната година се случил на 25 февруари, кога на унгарската граница било утврдено дека во сувиот копар има остатоци од хлорпирифос, исто како и кај неодамна вратените праски. По контакт со оваа состојка, потрошувачите може да доживеат различни ефекти врз нервниот систем, како што се главоболка, заматен вид, зголемена саливација, напади, а во екстремни случаи, во зависност од количината и должината на изложеноста – и кома и смрт, според Американски центар за контрола и превенција на болести. Овој зачин е повлечен од унгарскиот пазар.
На 23 јуни 2022 година во Романија било утврдено дека праските од Србија содржат хлорпирифос. Праските се повлечени од романскиот пазар. Повторно на 9 август на границата со Словенија бил пронајден сега веќе познатиот пестицид хлорпирифос, повторно во праски. Истиот пестицид бил пронајден во српско производство на корнишони на 18 август на границата со Хрватска и било наредено производите да се вратат или да се уништат. Повторно, хлорпирифос е пронајден во производ од Србија, во комбинација со аметоктрадин, во замрзнати шумски јагоди извезени во Белгија.
Во соседна Србија неодамна доста прашина се крена токму околу случајот со земјоделските продукти „зачинети“ со опасниот фунгицид хлорипирифос пронајдени во краставиците за извоз, поради информацијата дека не долго пред да се обелодени овој случај, министерката за земјоделие на Србија, Јелена Танасковиќ дозволила интервентен увоз и употреба на забранетата активна супстанца, која, инаку, одамна не се користи во Србија. Дел од таа супстанца завршила во овоштарството и градинарството.
За да завршат пред потрошувачите, прехранбените производи мора да поминат лабораториски тестови и да добијат доказ за здравјето. Ова вклучува проверка на контаминација за тешки метали, микотоксини, пестициди и други супстанции. „Законот за безбедност на храна вели дека храната која е небезбедна не може да се пласира во промет, а тоа го подразбира следното: да не содржи средства за заштита на растенијата, загадувачи, различни видови микроорганизми и други супстанции кои ги надминуваат максимално дозволените концентрации според до одредени прописи“, вели за Euroenews Србија, Александар Нешиќ, раководител на лабораторијата на Институтот Суперлаб.
