Аналитика
PepsiCo, Coca-Cola, McDonald’s и Starbucks во вторникот соопштија дека го прекинуваат деловното работење во Русија по инвазијата на таа земја во Украина, симболичен потег на четири иконични американски брендови. Пепси ги продава своите производи во Русија повеќе од шест децении, дури и во времињата кога компанијата мораше да го трампа својот концентрат од сода за вотката „Столичнаја“ и воени бродови. Мекдоналдс ја отвори својата прва локација надвор од „железната завеса“ во Москва, само неколку месеци пред да се распадне Советскиот Сојуз.
Последниве денови, Пепси, Кока, Мекдоналдс и Старбакс навлекоа критики поради тоа што продолжија со работата во Русија, додека други американски компании најавија суспензии и ја прекинаа продажбата.
Професорот од Јеил, Џефри Соненфелд состави и јавно го објави списокот на американски компании кои се повлекле од Русија по инвазијата на претседателот Владимир Путин – и оние кои не се повлекле од Русија. До вторникот попладне, Кока Кола беше меѓу најпрепознатливите имиња на табелата.
„Нашите срца се со луѓето кои трпат огромни последици од овие трагични настани во Украина“, рекоа од компанијата Кока Кола во кратката изјава во вторникот попладне. „Ние ќе продолжиме да ја следиме и проценуваме ситуацијата како што се развиваат околностите“.
Русија претставува еден од ретките региони во светот каде ривалот на Кока-Кола, ПепсиКо има поголемо присуство. Во годишниот даночен извештај на оваа компанија, Кока Кола објави дека нејзиниот бизнис во Украина и Русија придонел со околу 1% до 2% од нејзините консолидирани нето оперативни приходи и оперативни приходи во 2021 година.
Пепси, од друга страна, генерира приближно 4% од својот годишен приход во Русија, иако не го запира целиот бизнис во земјата. Компанијата соопшти дека ќе продолжи да продава некои основни производи, како што се детска формула, млеко и храна за бебиња.
Таа соопшти дека ќе ја прекине руската продажба на своите брендови Пепси-Кола, 7УП и Миринда, заедно со капиталните инвестиции и сите рекламни и промотивни активности.
„Како компанија за храна и пијалаци, сега повеќе од кога било мораме да останеме верни на хуманитарниот аспект на нашиот бизнис“, напиша извршниот директор на Пепси, Рамон Лагуарта, во белешка до вработените.
Волстрит журнал претходно во вторникот објави дека Пепси разгледува различни опции за својот руски бизнис, вклучително и отпишување на неговата вредност. Економските санкции во голема мера го искомплицираа процесот на истоварување на руските средства.
Од руската инвазија на Крим во 2014 година наваму, многу американски компании се обидуваа да ја намалат својата изложеност и во Русија и во Украина. Некои синџири на ресторани, како Мекдоналдс, продадоа некои од нивните локации во сопственост на компанијата на локални франшизи.
Мекдоналдс, исто така, во вторникот објави дека сите 850 руски ресторани привремено ќе се затворат. До тогаш, синџирот за брза храна молчеше за војната, предизвикувајќи посилни критики од неколкуте ресторански компании кои ја осудија инвазијата, но ги држеа своите локации отворени.
Околу 84% од руските локации на Мекдоналдс се во сопственост на компанијата, додека останатите се управувани од франшизи. Поседувањето на повеќе нејзини ресторани значи поголем приход за компанијата, но поголем ризик во време на превирања или економски пад.
Старбакс отиде чекор подалеку од Мекдоналдс, велејќи дека ќе ја прекине целата руска деловна активност, вклучувајќи ја и испораката на своите производи. Извршниот директор на Старбакс, Кевин Џонсон ја осуди агресијата на Русија врз Украина во петокот во јавно писмено обраќање.
Од двете ресторански компании, Мекдоналдс има поголемо присуство во земјата и добива поголем процент од својот глобален приход од тие продажби.
