Аналитика
Сериозните предизвици од глобалната геополитичка и економска криза наметнуваат нова реалност во секојдневното живеење и работење на сите економски субјекти. Високите цени на енергенсите и базичните производи, растот на инфлацијата и на каматните стапки заедно со високата неизвесност за идните случувања на сите полиња на глобален план, претставуваат значително променета околина која наметнува потреба од соодветни прилагодувања на сите субјекти на пазарот.
Како и во досегашниот период Стопанска банка АД Скопје (во натамошниот текст Банката) продолжува со успешно работење кое е овозможено од здравите фундаменти на Банката, успешно воспоставениот бизнис модел, силната капитална позиција, перманентните напори за постојани прилагодувања согласно промените во околината, како и применетите високи стандарди во делот на управувањето со ризиците и корпоративното управување. Заклучно со третиот квартал од 2022 година, Банката оствари добивка пред оданочување во износ од 2.289.998 илјади денари. Ваквиот финансиски резултат Банката го остварува со актива која на 30.09.2022 година изнесува 116.961.561 илјади денари, зголемена за 3% во однос на крајот од минатата година.
Нето-приходите од камати изнесуваат 3.049.596 илјади денари или 49,6 милиони евра што е за 3,3 милиони евра повеќе од истиот период лании, како резултат на зголемените кредитни активности и врз основа на тоа-зголеменото кредитно портфолио на Банката.
Нето-приходите од провизии и надоместоци изнесуваат 666.658 илјади денари и се зголемени за 5% во однос на анализираниот период во 2021 година. Ова е резултат на зголемен обем на активности односно зголемен обем на испорачани услуги на клиентите, од кои најмногу во делот на услугите во платниот промет и картичното работење.
Нето-приходите од курсни разлики изнесуваат 121.119 илјади денари и забележаа пораст од 24% (половина милион евра повеќе од лани) како резултат на зголемениот обем на тргувања на девизниот и менувачкиот пазар.
Останатите приходи од дејноста забележаа зголемување од 58% (се повисоки за 3 милиони евра) и сега изнесуваат 513.722 илјади денари или 8,3 милиони евра.
Оперативните трошоци од работењето забележаа зголемување од 7% во согласност со инфлаторните притисоци, при што трошоците за вработени изнесуваат 701.247 илјади денари, додека останатите оперативни трошоци изнесуваат 728.219 илјади денари.
Во анализираниот период, Банката издвои исправка на вредност на финансиските средства и посебна резерва за вонбилансната изложеност, на нето-основа, во износ од 627.085 илјади денари, која е зголемена за 3% во однос на истиот период од претходната година.
Вкупната актива изнесува 116.961.561 илјади денари и е повисока за 3% односно 2.858.862 илјади денари во однос на крајот од минатата година.
Паричните средства и паричните еквиваленти споредени со крајот на 2021 година се пониски за 2.527.161 илјади денари, односно за 12%, како резултат на порастот на кредитните активности на Банката и употребата на ликвидноста за оваа намена.
Кредитите на и побарувањата од други комитенти остварија нето пораст од 7% споредено со крајот на минатата година и изнесуваат 83.452.762 илјади денари.
Кредитите на и побарувањата од банки изнесуваат 324.594 илјади денари и бележат зголемување во однос на крајот на 2021 година за 17%.
Вложувањата во хартии од вредност изнесуваат 11.884.657 илјади денари и се намалени за 3% во однос на крајот на минатата година, како резултат на зголемените кредитни активности на Банката, односно пласманот на овие средства кај населението и компаниите.
Останатите побарувања забележаа пораст од 10% и изнесуваат 1.724.643 илјади денари.
Вкупните депозити на други комитенти изнесуваат 88.125.694 илјади денари.
Капиталот и резервите изнесуваат 21.888.299 илјади денари, што претставува зголемување за 11% во однос на крајот на 2021 година. Имено, со Одлука на Собранието на акционери на Банката, донесена во мај 2022, сопствените средства се зголемени за нови 30 милиони евра, капитал кој обезбедува основа за понатамошен раст на кредитините активности и реализација на зацртаните бизнис-цели во наредниот период.
Вложувањата или продажбата на материјалните средства (недвижности, постојки и опрема) или значителен отпис (поголем од 30% од вредноста на средството споредено со последните годишни ревидирани финансиски извештаи)
Недвижностите и опремата изнесуваат 971.100 илјади денари.
Промени во кредитните задолжувања (намалувања или зголемување поголеми од 30% споредено со последните годишни ревидирани финансиски извештаи)
Обврските по кредити изнесуваат 1.860.774 илјади денари и се зголемени за 10% во однос на крајот на 2021 година, пред сѐ поради искористување на поволните услови од расположливите кредитни линии.
Какви се очекувањата на менаџментот за претстојниот период што следи?
Стопанска банка ќе ги продолжи своите активности согласно деловниот план, истовремено водејќи грижа за зачувување на квалитетот на кредитното портфолио во услови на зголемени ризици во севкупната околина, поддршка на работењето на клиентите во сите сфери, како и целосно исполнување на сите регулаторни обврски. Грижата за стабилноста, ликвидноста, прудентното управување со ризиците и посветеноста на одржување на лидерската позиција во банкарскиот систем, останува во доменот на основните приоритети и во наредниот период.
И понатаму, како приоритет, остануваат новите дигитални и функционални можности за клиентите преку веќе воспоставената комуникациска инфраструктура.
Грижата за општествената заедница и вработените исто така остануваат во преден план, со иста приоритетна важност како останатите спомнати цели.
