Аналитика
Цените на нафтата на светските берзи повторно пораснаа минатата недела, достигнувајќи нови највисоки нивоа за повеќе од седум години, бидејќи трговците стравуваат од прекини во снабдувањето поради украинската криза, објави Кликс.
Ова е шеста недела по ред како поскапува нафтата на светските берзи.
Цената на барелот на лондонскиот пазар минатата недела порасна за 2,4 отсто, на 90,03 долари, додека на барелот на американскиот пазар за 2 отсто, на 86,82 долари.
Во петокот во еден момент цените на нафтата беа уште повисоки, достигнувајќи ги највисоките нивоа од 2014 година бидејќи трговците стравуваат дека украинската криза може да предизвика пореметувања на енергетските пазари, пишува Ројтерс.
„Премијата за ризик на цената на нафтата сега веројатно е речиси 10 долари за барел“, рече Карстен Фрич од Комерцбанк.
Повисокиот раст на цените беше спречен од зајакнувањето на доларот, чија вредност во однос на валутната група минатата недела порасна за 1,7 отсто и достигна највисоки нивоа од средината на 2020 година, бидејќи американската централна банка се очекува наскоро да ги зголеми клучните каматни стапки.
Бидејќи цената на нафтата се изразува во долари, тоа ја прави нафтата уште поскапа во други валути, а со тоа ја ослабува побарувачката.
Оваа недела трговците ќе се фокусираат на состанокот на ОПЕК и другите големи светски производители, на кој ќе се преиспита производната политика и планот за зголемување на производството во март за 400 илјади барели дневно.
