Аналитика
ТТК БАНКА ГО ПОТВРДИ УСПЕХОТ и оствари добивка од 30,5 милиони денари во прв квартал од 2022, што претставува повисок резултат за 18,3 милиони денари или за 149,5 % во однос на истиот период минатата година. Планираниот финансиски резултат за првиот квартал од годинава ТТК Банка го оствари со 117 %.
КАКВИ СЕ ОЧЕКУВАЊАТА НА МЕНАЏМЕНТОТ ЗА ПЕРИОДОТ ШТО СЛЕДИ?
Сегашната клима сугерира дека и оваа година ќе биде предизвикувачка и затоа Банката и понатаму внимателно ќе ги анализира тековните макроекономски параметри, ќе ги следи мерките, активностите и предвидувањата на економските авторитети и на носителите на економските политики и на операторите, ќе ги усогласува интерните индикатори и ќе го приспособува нејзиното работење на пазарните услови, со фокус кон одржување на ликвидноста и долгорочната стабилност.
Како резултат на војната во Украина, забележан е пад на понудата на нафта, гас, метали, пченица и пченка, што пак доведе до пораст на цените на пазарот на овие добра. Сè поголем е ризикот од негативното влијание на секундарните ефекти и врз економската активност. Покрај ефектите од војната, во Кина се забележуваат нови „локдауни“ на големи производствени центри како одговор на пандемијата од КОВИД19, а коишто можат да доведат до нови, значајни застои кај глобалните синџири на снабдување. ММФ очекува значајно забавување на опоравувањето на глобалната економија, што би резултирало со забавен раст и дополнително забрзување на растот на инфлацијата. Предвидениот раст на БДП за 2022 и за 2023 година изнесува 3,6 % 1 , што претставува намалување на претходните проекции за 0,8 и 0,2 п.п. Дури и пред почетокот на војната, инфлацијата зеде замав кај повеќе економии заради порастот на цените и дисбалансите на понудата и побарувачката предизвикани од пандемијата. Сега, се очекува тековните застои на снабдување да продолжат да влијаат и во 2023 година, додека да се активираат нови производствени капацитети во други региони, мотивирани од зголемените продажни цени на стоките. Следствено на тоа, и инфлацијата се предвидува да остане повисока за подолг временски период отколку претходно предвидениот.
Банката ќе продолжи да дејствува проактивно, фокусирајќи се кон стабилно и профитабилно оперативно работење врз основа на реални и на предвидливи очекувања. Растот на кредитната активност се очекува да продолжи да се реализира преку работата со населението и со малите и средни претпријатија, паралелно со севкупното закрепнување на економската активност и на зголемената побарувачка за кредити. Притоа, Банката ќе ги презема сите неопходни активности за одржување на квалитетот на портфолиото, развој на понудата на производи и изнаоѓање флексибилни решенија приспособени на потребите на клиентите – правни и физички лица кои се најзасегнати од КОВИД-19 кризата.
Креирањето одржливи и ефикасни процеси, реализацијата на планираниот обем на активности предвидени со деловната политика, понудата на нови производи приспособени на потребите на клиентите, натамошниот развој на дигитализација на процесите, надградбата на производите и услугите достапни преку дигиталните канали и потпирањето на сопствените извори на финансирање и понатаму ќе претставуваат основа на деловната стратегија на Банката за оваа 2022 година, при што и натаму депозитите од секторот население остануваат со доминантно учество во вкупните извори на средства.
