АКО ДВЕТЕ КОНЦЕСИИ ЗА ИЛОВИЦА СЕ ОДАМНА ИСТЕЧЕНИ, спојувањето е незаконско?

Време зa читање: 4 минути

Двете концесии за рудникот Иловица се одамна истечени и нивното спојување е незаконско. Првата концесија била издадена во 2012 година, а втората во 2016, но и за двете концесии, концесионерот Еуромакс Рисорсис не поднел барање за дозвола за експлоатација во законски предвидениот рок од четири години, со што, според важечкиот Закон за минерални суровини бил исполнет еден од условите за раскинување на концесиите. Министерството за економија уште во 2020 година морало да ја раскине и втората концесија за Иловица, ако постапувал според Законот за минерални суровини, но тоа не било сторено.

Сегашната одлука на Владата, на која инсистира министерот Крешник Бектеши, за спојување на двете концесии, а која стана предмет на контроверзи по бурните реакции на јавноста, но и по ретерирањето на дел од министрите кои претходно гласале за таа одлука на седницата на Владата на 27 јуни, според тоа, е незаконска.

Ова произлегува од увидот во договорите за концесиите потпишани помеѓу Еуромакс Рисорсис и Владата, како и членовите 52 и 54 од Законот за минерални суровини . „Крешник Бектеши не го интересираше законот за втората концесија на Иловица која требаше да се одземе во 2020. Член 61 став 3 не дозволува рокови поголеми од првата концесија но особено не предвидува измислици за дополнителни нови 4 години рок за добивање дозвола за експлоатација“, категорични се од Здрава Котлина.

„Јавно го повикуваме министерот Бектеши сега нека покаже во медиумите кога Еуромакс Ресурси барале од Министерството за економија како концедент да одобри пренос на управувачки пакет, нека покаже кога и колку платиле во буџетот за тој пренос согласно законот, нека покаже решение од Владата за одобрување на залог врз концесијата во корист на Ројал Голд како трето лице а за кредитни потреби на Еуромакс Ресурси, затоа што барањето за спојување на концесиите е токму со такво барање и затоа тие концесии не беа споени уште од времето на Груевски. Финално нека покаже по кој член на законот споени концесии добиваат нови 4 години рок за добивање на дозвола! Особено ако спојувањето се врши во 2023“, велат од еколошкото здружение.

Министерството за економија претходно соопшти дека нема да го смени ставот околу спојување на концесиите за Иловица – Штука и концесионерот Еуромакс и колку и пати да е потребно ќе го достави истиот предлог, концесиите да се спојат.

Иако првично беше соопштено дека Владата ја донесе одлуката по насоки на судска пресуда на денешниот брифинг со новинарите министерот Бектеши ретерираше и кажа дека одлуката се темели врз членот 61 од законот за минерални суровини кој предвидува спојување на концесии и одлуките на Управниот и Вишиот управен суд а со цел да ги штити интересите на државата и да спречи уште еден арбитражен процес и плаќање на евентуални милионски штети.

Случајот со спојувањето на двете концесии на просторот на идниот рудник Иловица, силно је стресе Владата откако на виделина излезе дека министрите гласале за ваквиот предлог на Министерството за финансии, иако тоа не било обврска произлезена од пресудата на Управниот суд, а со ставањето на точката на дневен ред со назнака на итност, била избеглата вообичаената процедура за подготовка на владината седница по оваа точка од дневниот ред, со што под знак прашање било доведено и почитувањето на Деловникот за работа на Владата.

Излезе дека одлуката за спојување на двете концесии за Иловица, која ја носи Владата на 163-та седница, не е по насока на Управниот суд, како што од почеток се тврдеше, туку по сопствена проценка и според член 61 од законот за минерални суровни кој не е обврзувачки.
Управниот суд, од увидот во документите од пресудата со која ја враќа одземената концесија за Иловица, јасно и недвосмислено се оградува од ова прашање и наложува да одлучат министерството за економија и Владата.

Според порталот дома.еду.мк, спојувањето на концесиите за рудникот Иловица бил еден од условите кои морало брзо да бидат исполнети за холандската фирма НД Груп, во сопственост на тетовецот Назиф Дестани да може да стекне уште поголем удел од сопственоста на канадската компанија Еуромакс Рисорсес која подолг период го турка проектот за отварање на рудник на бакар и злато во струмичко.Фирмата НД Груп, која е во сопственост на Еколог и неговиот газда Дестани во јануари годинава вложила три милиони долари во Еуромакс во вид на директна позајмица.

Одлуката на Владата за Иловица беше непосреден повод за граѓански протест во Струмица минатата сабота, а дел од министрите се оградија од своето гласање по оваа точка на владиниот дневен ред, со образложение дека не биле соодветно информирани од страна на нивниот колега, министерот за економија, Крешник Бектеши.

АКО ДВЕТЕ КОНЦЕСИИ ЗА ИЛОВИЦА СЕ ОДАМНА ИСТЕЧЕНИ, спојувањето е незаконско?

слично