Во Франција инфлацијата во април изнесувала 4,8%

Во април потрошувачките цени во Франција се зголемиле за 4,8%, по +4,5% во март. Генералниот директор на Банката на Франција во средата вети дека ќе го врати ценовниот притисок во втората по големина економија во еврозоната во согласност со целта на ЕЦБ за инфлација од околу 2 отсто до 2024 година, јавува Јуроњуз. „Ќе направиме се што е потребно за да ја вратиме инфлацијата на околу 2%, ова е грижа број еден на Французите“, изјави Франсоа Вилерој де Галхау за телевизијата Франс 5, додавајќи дека ја споделил целта за Франција во 2024 година со шефот на Европската централна банка, Кристин Лагард.

ЕЦБ ги зацврсти очекувањата дека ќе ја зголеми референтната каматна стапка во јули за прв пат по повеќе од една деценија за да се бори против рекордно високата инфлација, при што некои креатори на политики дури во средата навестија натамошни зголемувања.

Месото, брашното, маслото се само дел од основните прехранбени продукти кои поскапеле во Франција, при што некои прехранбени производи се попогодени од другите, пишуваат француските медиуми. Зголемувањето на цените се чувствува веќе многу месеци во француските супермаркети. Во септември 2021 година, INSEE веќе процени инфлација на 2,1% во текот на една година. Осум месеци подоцна, ова ниво сега изнесува 4,8% инфлација за една година, повеќе од двојно.

Во извештајот на францускиот Институт ИРИ, кој ја пресметува инфлацијата на производите за широка потрошувачка во супермаркетите секој месец, има голем број на прехранбени производи кои се под притисок особено поради сушата, а потоа и поплавите во Канада. Силни горештини се забележани и во Русија и во САД. Тие особено ја нарушија жетвата на тврда пченица, основна состојка во производството на тестенини или производството на семе од синап.

За месните производи, зголемувањето е најголемо за последниве две години, според Грегори Карет, директор на Опсерваторијата за потрошувачка во UFC-Que Choisir. „Говедското месо страда од инфлација, особено поради порастот на цената на житариците кои се користат за исхрана на добитокот. Овој феномен е засилен со периодите на суша кои се случија во Франција како и на други места“, додава Карет.

Растителните масла се под притисок поради поскапувањето на горивата. Бидејќи тие се основа за производство на биогориво, придонесуваат за поголема побарувачка.

Што се однесува до кафето, особено слабите жетви во Бразил и политичките немири во Колумбија ги зголемуваат цените. Овој контекст е додаден на дополнителните трошоци поврзани со цената на енергијата и кризата со Ковид за транспортот на оваа стока од која Франција има корист исклучиво благодарение на увозот.

Други структурни фактори како што е зголемувањето на цената на палетите или материјалите за пакување за сите овие производи додаваат уште еден слој на инфлацијата.

Според финансиските експерти во државата, се предвидува инфлација во Франција да достигне 5% на почетокот на летото. “Ова ниво не е достигнато од 2008 година“, потсетуваат тие, како и дека „ефектот од војната во Украина треба да почне да се чувствува во наредните недели“ и да помогне да се прошири нагорното движење на цените.