Тектонски поместувања во бизнисот на Макпетрол

Кога фабриката Мишелин започнала да прави автомобилски гуми многу малку луѓе имале свои автомобили, а и тие што имале ретко ги користеле. Затекнати во една таква ситуација со огромни предизвици, но и уше поголема желба за истрајност и визија, од фабриката се одлучуваат преку маркетинг кампањи да ги мотивираат луѓето почесто да користат автомобил, а со тоа да се зголеми нивната потрошувачка за гуми. Трикот им успеал преку сортирање на рестораните во зависност од степенот на услуга, квалитетот на храна и слично, а со тоа тие добивале т.н. Мишелинови ѕвезди. Ваквите ресторански критики ја пробудувале желбата кај луѓето да посетат различни ресторани на различни места. Многу подоцна овие ѕвезди ќе станат престиж во кулинарството, но првичната идеја била сосем поинаква. Во една таква конотација, на сличен начин функционира уште една индустрија – Бизнисот со продажба на горива. Се чини дека последните случувања со Ковид-19 значително ги нарушија воспоставените практики на потрошувачка на гориво, а исто така и зголемената свест за загадувањето има свој придонес. Анализирајќи ги годишните неревидирани податоци за Макпетрол, се наметнува прашањето дали и тие се во ситуација да смислуваат нови алтернативни начини за стимулирање на потрошувачката по примерот на Мишелин?

Околу билансот на состојба споредбено 2019 со 2020 година се добива впечаток дека ништо драматично и не се сменило.

• Од аспект на материјалните средства евидентирано е зголемување на недвижностите со кои управува компанијата за 1.5%
• Во долгорочните финансиски средства, одлуката паднала вишокот на ликвидност да се пласира во вид на хартии од вредност. Порастот на ова салдо изнесува скоро 700.000 ЕУР.
• Тековните средства ги одбележале следниве промени: Намалување на нивото на залихи за 13%, Намалување на ставките побарувања од купувачи и останати побарувања во кумулативен износ од 3.3 милиони ЕУР.
• Компанијата успеала да не се дозадолжува, туку напротив нивото на кредитна изложеност во 2020 е помало во споредба со 2019 година. Износот кој успеале да го вратат изнесува 3 милиони ЕУР.

Суштината на бизнис сегментот може да се долови преку анализа на билансот на успех. Таму се случиле тектонски поместувања  во позициите.

• Компанијата бележи пад на оперативните приходи од 26.8%. Сегментирајќи ги приходите на домашни и странски ситуацијата е следна: пад на домашните приходи од 23.3%, додека падот кај приходите од странство изнесува 75%. Во кумулативен износ вкупните приходи на Макпетрол бележат пад од вртоглави 99 милиони ЕУР.
• Оперативните расходи исто така го прателе трендот на пад на обем на работа и истото пресликано во бројки е намалување од 24.8%.
• Тежината на ударот од кризата е пресликан и преку чисто финансиските приливи и одливи во 2020 година. Истите, бележат значителни намалувања во износи од 667.000 ЕУР на приходната страна и 450.000 ЕУР на расходната страна.
• На крај сето тоа резултираше Макпетрол да ја затвори годината со 5 пати помала нето добивка. Со други зборови, на контото акумулирана добивка придонесот од 2020 година изнесува 6.3 милиони ЕУР.

Редакција Пари