Аналитика
Депозити на злато со висока концентрација беа пронајдени во северозападниот дел на БиХ за време на неодамнешните геолошки истражувања, а сега се работи на утврдување на профитабилноста од експлоатацијата на овие наоѓалишта, објави во четвртокот компанијата која ја истражува почвата во областа. Според тврдењата на Милош Бошњаковиќ, генералниот директор на компанијата наречена „Ликос Балкан Металс“, траги од злато биле пронајдени во областа на малата општина Језеро, лоцирана покрај реката Плива во околината на Мркоњиќ Град.
„НЕВЕРОЈАТНА СОДРЖИНА НА ЗЛАТО“
Бошњаковиќ, чија компанија доби концесија за геолошки истражувања во оваа област, тврди дека досега отворените дупнатини покажале „неверојатна содржина на злато“ во почвата. „На три локации е потврдена висока содржина на злато на контактите на различни литолошки единици, до неверојатни 27,5 грама на тон во континуитет од дури 60 метри, што е невообичаено висока содржина дури и за светски познатите рудници за злато,“ изјави Бошњаковиќ, цитиран од порталот „Независне новина“ од Бања Лука.
Геолошките истражувања започнаа минатата година и засега претставуваат рана фаза, а Бошњаковиќ вели дека ќе бидат потребни уште неколку години работа за да се утврдат сите важни информации за наоѓалиштето злато и можностите за негова експлоатација. Тој рече и дека за ова ќе бидат потребни значителни финансиски средства, па ги повика локалните власти да се вклучат.
„Ликос Балкан Металс“ е компанија со седиште во Бјелина, БиХ, а е основана од компанијата Ликос Металс ДООЕЛ, регистрирана во Австралија. На веб-страницата на компанијата Бијелина е наведено дека се занимаваат со геолошки истражувања на обоени и благородни метали, а тоа сега го прават во БиХ на три одделни локации, од кои едната ја вклучува општината Језеро.
Главниот геолог на „Ликос“ Младен Стевановиќ претходно изјави дека главна цел на нивното истражување е потрагата по метали како што се кобалтот и бакарот, кои се повеќе се бараат на пазарот, особено поради нивната употреба во производството на електрични возила. „Статистиката покажува дека еден од сто истражувачки проекти оди во фаза на рудник“, рече Стевановиќ.
