Аналитика
Повеќе од 53 милиони евра се слеале преку наплатните станици за платените патарини. Прометот е остварен во текот на минатата година и со 6,6 милиони евра ги надминуваат остварените 46,6 милиони евра во 2021. Износот е солиден, што не може да се каже и за добар дел од патиштата низ земјава.
Најголем дел од средствата се инкасирани на наплатната станица кај Романовце, над 6,5 милиони евра. Следат патарините кај Миладиновци со повеќе од 4,3 и кај Глумово со речиси 4,2 милиони евра, информира преку МИА Јавното претпријатие за државни патишта.
Патарината во Градско придонела со нешто над четири милиони евра, Желино со 3,9, Гевгелија -3,8, Петровец 3,3, Тетово – 3,2, Сопот со 3,1, Отовица – 3,04, Демир Капија – 2,7 и Гостивар со 2,6 милиони евра.
Новите патарини, пак, кои се во употреба од 18 јули лани, Преод и Кадрифаково на патниот правец Миладиновци – Свети Николе – Штип, во вкупниот износ учествуваат со 1,3, односно 1,1 милион евра.
Сепак, постојат разлики во цената на патарините по категории, а факт е дека Сопот и Отовица се единствените кои имаат наплатни кабини во само еден правец.
Граѓаните најчесто патарината ја плаќаат во кеш, односно тоа е забележано со 55 проценти, додека примента на платежни картички опфаќа околу 15 отсто. Уделот на електронската наплата, воведена како опција пред речиси четири години, велат од ЈПДП, е во пораст. Конкретно, таму каде што има можност, надминува една третина од наплатата, при што на овој начин се реализирани 5,3 милиони евра. Податоците покажуваат дека од 2019 па до сега се продадени 144.591 парчиња М-Смарт картички и 17.412 М-Таг уреди, или вкупно 162.003 електронски уреди. Исто така, регистрирани се 851.272 поединечни надополнувања на електронските уреди.
За потсетување, во рамките на „Отворен Балкан“ меѓу Македонија, Србија и Албанија треба да се воспостави единствен систем за електронска наплата, што е договор кој произлезе на охридскиот самиот. Оттаму, во тек е постапката за техничко и финансиско усогласување, со што ќе нема непотребно задржување на наплатните рампи.
Возачите плаќаат патарини, но се незадоволни од состојбата на македонските патишта. Поплаките се чести особено од професионалните возачи, кои упатуваат на тоа дека работата трпи поради лошите услови на патиштата. Всушност, на состојбите во овој домен укажуваат и странците, со препорака – направете ги патишта за да ја кренете економијата. Релноста, пак, покажува – дупките не се санираат редовно, а изградбата на нови патишта може да трае со години, како што е случајот на релацијата Кичево – Охрид, каде што изградбата почна во веќе далечната 2014.
Според владините најави, годинава ќе има силна градежна експанзија, а и ЈПДП има најголем буџет досега, предвиден за изградба и рехабилитација на државните патишта, при што за инвестиции се планирани 486 милиони евра. Меѓу другото, се посочуваат активности за изградба на 140 километри автопат на коридорите 8 и 10, за што од државниот буџет се издвојуваат 244 милиони евра.
