Аналитика
Континуиран пад на индустриското производство е загрижувачки податок кој може да ги измести макроекономските проекции. Последната статистика на Државен завод за статистика укажа на пад на индустријата од 6,5 отсто во јуни споредено со истиот месец минатата година. Индустриското производство во периодот јануари – јуни 2024 година, во однос на периодот јануари – јуни 2023 година бележи пад од 5,1%. Намалувањето на производството има во 10 индустриски сектори во рамки на преработувачката индустрија кои се главно извозници. Гледано по сектори, индустриското производство во секторот рударство и вадење на камен во јуни годинава во однос на ланскиот јуни бележи опаѓање од 9,5 %, во секторот преработувачка индустрија бележи опаѓање од 4,2 %, а во секторот снабдување со електрична енергија, гас, пареа и климатизација опаѓање од 16,7 %.
Текстилните компании го намалиле производството за 9,8%, а оние кои произведуваат облека за 19,8%. Намалено производство имаат и компаниите кои произведуваат хартија и производи од хартија, производство на хемикалии и хемиски производи. Намалено е производство и во секторот производство на основни фармацевтски производи и фармацевтски препарати каде за 15,3%, потоа во секторот производство на метали, производство на фабрикувани метални производи за 35,1%
Колку за споредба во изминатите месеци од годинава, индустриското производство во мај бележи пад од 13,2%, во април во однос на истиот месец лани е намалено за 1,2 проценти. А, пак, во март годинава во однос на март минатата година е намалено за 10,4 проценти.
Претседателот на Собранието на Организацијата на работодавци на Македонија, Ангел Димитров, за порталот „Пари“ вели дека падот на прометот на индустриското производство е многу негативен показател за земја како што е Македонија со степен на економски развој каде што индустријата, извозот и конкурентноста се основа за повисок економски раст и зголемување на стандардот на граѓаните.
– За разлика од нас, богатите држави, кои издвојуваат десет пати повеќе во истражување и развој можат растот да го темелат на способноста на иновации и производство на нови софистицирани производи и услуги со голема додадена вредност. Треба да се истакне дека ние како општество се наоѓаме во некоја фаза каде што сакаме да имаме плати и стандард како развиените држави, а нашата стопанска структура е многу поразлична од нивната – нагласува Димитров.
Тој укажува дека треба да сфатиме дека индустријата е многу важна и без нејзин развој ќе имаме уште поголеми проблеми со извозот, трговскиот дефицит, а понатаму и со буџетот и финансиската стабилност на земјата.
-Глобалните кризи и падот на побарувачката во светот, директно се одразуваат на нашите извозни компании, кои не можат за краток рок да најдат нови пазари и купувачи. Исто така, зголемените каматни стапки, воведени со цел да се намали инфлацијата, директно влијаеја на одлуките за инвестирање, а со тоа се спречува набавката на современа технологија и опрема што ќе ја зголемат продуктивноста и ќе ја зголеми нашата конкурентност на светските пазари – вели Димитров.
Една од причините што ја нагласува тој за падот на индустријата е и нестабилноста на политиките, политичките кризи кои влијаат на одлуките на бизнисмените за натамошниот развој на нивниот бизнис.
-Многу важен фактор е и недостиг од стручна работна сила што Македонија подолго време се соочува. Пазарот на трудот е нефункционален, а образованието не произведува квалитетен кадар што му е потребен на нашето стопанство – укажува Димитров, споменувајќи дека административниот товар што го трпат нашите компании е сѐ поголем и поголем, а при носењето на законите никој не води сметка за тоа.
Тој смета дека нашите влади не треба да донесуваат разни стратегии и планови, кои се полни со желби, без конкретни мерки и промени што треба да ги решат сите овие прашања.
К.М.
