Аналитика
Храната одзема голем дел од буџетот на секое семејство, а поскапување оди исклучиво на товар на граѓаните. Затоа – да се замрзнат цените на основните прехранбени производи, е барањето од Организацијата на потрошувачи, кое го соопшти претседателката Маријана Лончар Велкова.
Комисијата за заштита на конкуренција би требало да реагира за да види дали има некакво здружување на трговците по толкавото „плафонирање“ на цените од нивна страна, смета таа.
„Знаеме дека замрзнувањето на цените е популистичка мерка и дека имаме пазарна економија, но во вакви ситуации не треба да се чека, треба да се излезе со точна проценка и да се преземат мерки, зашто се оди на товар и на штета на потрошувачот. За основните намирници мислам дека не треба ни да се зборува. Поради високите цени многу граѓани купуваат производи со помал квалитет или со помала нутритивна вредност, а пристапот до основните прехранбени производи е елементарно човеково право. Потрошувачот мора да има пристап до основните потрошувачки добра, особено храната – млеко, сирење, путер…“, одговори на новинарските прашања Лончар Велкова, која присуствуваше на промоцијата на Прирачникот за енергетска сиромаштија.
Последниве недели цените непрекинато растат кај млечните производи, особено оние на овошјето и зеленчукот, кои го држат зимското ниво. Освен тоа, од септември од пет на 10 проценти се зголемува ДДВ за одредени производи кои државата ги смета за луксуз. Наспроти тоа, засега освен најава за анализи и можни потези, властите не упатуваат на конкретни мерки.
Единствено министерот за економија Крешник Бектеши побара од инспекциски служби да се активираат и притоа да се утврдат мотивите за неконтролираното ценовно движење. И тој ја прозва Комисијата за заштита на конкуренцијата, зашто не направила ништо за да ги спречи поскапувањата.
„Не можеме да се мешаме во работата на Комисијата директно, зашто се избира од Собранието. Затоа почнавме со измени во Законот со кој се определува нејзината работа“, посочи министерот..
Оттаму, рече, ако има потреба ќе има и мерки, но доколку се утврди дека трговците манипулираат со цените, можно е да добијат забранат за работа, што е содржано во Законот за заштита на потрошувачите.
Против замрзнувањето на цените е бизнис заедницата. Нивните укажувања се дека државата треба да пристапи кон други мерки кои ќе бидат ефикасни во превенирањето и ублажувањето на ценовните шокови. Наведуваат дека од помош ќе биде намалувањето на маржите на даноците. Но, и отворањето на варијантата стоковни резерви.
Пред неколку дена и вицепремиерот за економски прашања фатмир, Фатмир Битиќи, рече дека кај дел од големите трговци и трговски синџири е забележано нефер однесување. Најави санкции, без да коментира дали се тие директните виновници за движењето на цените. Тој не прецизираше дали тие стојат зад последниот бран на поскапувања и не сакаше да соопшти за кого станува збор но, како и министерот Бектеши, најави санкции за нив.
