Аналитика
Македонија е на пат да добие трет мобилен оператор. Унгарскиот телекомуникациски оператор 4iG нареднава недела и официјално ќе поднесе апликација за влез на македонскиот телекомуникациски пазар, информираа претставници на компанијата на средба со медиумите од земјава, која се одржа во Тирана.
Унгарскиот 4iG во нашата земја ќе работи под името „Оне Македонија Телекомуникејшн“ и ќе нуди мобилни, фиксни и ТВ услуги. Освен во Унгарија, оваа компанија за кусо време успеа да се наметне и на телекомуникацискиот пазар во Црна Гора и во Албанија, а Северна Македонија е трета балканска држава каде планираат да го прошират својот бизнис.
Компанијата соопшти дека во земјава планира да вложи 100 милиони евра во следните 10 години и не планира да купува постоечки оператор.
„Ова е таканаречен план за влез на пазарот преку „greenfield“ пристап. Тоа значи дека суштински ќе влеземе самостојно. Се разбира, ќе треба да имаме многу локални партнери од европскиот простор за инфраструктурата, кулите и добавувачите на опрема од кои ќе ја купуваме опремата. Како и во Албанија и во Македонија, ограничени сме во изборот, бидејќи е многу важно да соработуваме со европски или некинески добавувачи. Во Албанија, на пример, работиме со шведскиот „Ericsson“. Во овој момент, можам да кажам дека инвестицијата ќе биде најмалку 100 милиони евра што ќе треба да ги вложиме во мрежата и во сè друго. Но, тоа е долгорочна инвестиција. Ова не е нешто за 2 години, 5 години или 10 години. Ова не е компанија што останува статична. Како што велиме, оваа индустрија е маратон. Затоа сме стратешки инвеститори. И откако ќе влеземе на пазарот и мрежата ќе биде подготвена, ќе треба да продолжиме да инвестираме секоја година, веројатно 15-20% од нашите приходи. Тоа е многу“, изјави Пал Заранди, директор за мобилни и 5Г стратегии на групацијата 4iG.
Првиот чекор треба да биде добивање на фреквенција за мобилен оператор од страна на Агенцијата за електронски комуникации (АЕК). Ако ја добијат, првите услуги на 4iG за македонските граѓани би биле достапни во текот на следната година.
Заранди потврди дека веднаш по средбата со македонските медиуми заминува за Скопје. „Таму ќе одржам финален состанок со регулаторниот тим и експертите од бизнис секторот. Ќе поминеме низ нашето писмо за апликација, врз основа на кое ќе го финализираме процесот. Или оваа недела или на почетокот на следната недела планираме официјално да го потпишеме“, рече Заранди.
Компанијата веќе се етаблираше на пазарите во Црна Гора и Албанија, кои ги смета за успешна деловна приказна, а проценуваат и дека македонскиот пазар е поволен за нивна работа каде што доминираат двата мрежни оператори Македонски телеком и А1.
„Оваа можност се појави кога сфативме дека постои поволно политичко опкружување. Секогаш кога сакаме да влеземе на нов пазар во телекомуникацискиот бизнис, многу е важно регулаторната средина и владата да нè прифатат позитивно. Сметаме дека сме добредојдени во Македонија. Тоа беше првиот чекор“, нагласи Заранди.
За унгарската компанија 4iG беше многу важно што нашата земја има многу добра понуда на опсег на фреквенции што може да им ја олесни работата. „Опсегот на фреквенции е многу важен – тоа е како кислородот за телекомуникациите. Тој е суштински. Без него, не можете вистински да станете значаен играч на пазарот. Ако го имате, добивате многу можности да го правите она што сакате. Тоа беше знак дека овој пазар е навистина интересен“, појаснува директорот за мобилни и 5Г стратегии на групацијата 4iG.
И покрај тоа што треба да им конкурира на двете досега цврсто етаблирани компании на македонскиот пазар, од 4iG сметаат дека тоа им е, всушност – предност. „Ќе имаме предност, бидејќи, за разлика од добро воспоставените телекомуникациски оператори, нема да треба да инвестираме во 2G и 3G технологии. ИТ системот, исто така ќе биде многу поедноставен, што ќе ни овозможи целосно да се фокусираме на 4G и 5G. Ќе можеме да започнеме со напредна архитектура за 5G, додека постарите оператори сè уште експериментираат со интегрирана архитектура. Ова е нов вид на бизнис модел“, вели Заранди.
4iG СОЗДАДЕ УСПЕШНА ПРИКАЗНА ВО ЦРНА ГОРА И АЛБАНИЈА
4iG, кој влезе како стратешки инвеститор, прво во Црна Гора, а потоа во Албанија, во периодот 2022-2023 година, веќе е успешен телекомуникациски играч во двете држави. Карактеристика на пристапот на 4iG беше нивната проинвестициска стратегија, која се состоеше во тоа што тие инвестираат во телекомуникациски оператори кои со години се запоставени во поглед на инвестиции.
„Во Црна Гора, ова донесе подобрување на мрежната инфраструктура, инвестиции во нов бренд и воведување на брендот ONE, како и аквизиција на 5G фреквенциски опсег во рок од две години. Во Албанија, приказната беше малку поинаква и покомплексна, бидејќи компанијата One Albania настана со спојување на два телекомуникациски оператори – Алтелеком, кој беше фиксниот оператор и One Telecommunications, кој беше водечкиот мобилен оператор во тој период“, вели Брано Ѓуровиќ, извршен директор на ONE Албанија, компанија на 4iG во оваа држава.
Со аквизицијата на двата мобилни и фиксниот оператор, дојде до консолидација и создавање на нов пазарен играч – One. Ова беше голем инвестициски чекор, бидејќи самиот процес на спојување бараше значителни инвестиции во мрежната инфраструктура. ONE Албанија е прва телекомуникациска компанија во Албанија која на своите корисници им ги понуди своите 5G услуги.
„Нашите корисници продолжуваат да ги користат своите тековни пакети и истовремено ги уживаат сите предности на 5Г, како побрз интернет, пократко време на одѕив и поголема можност за истовремено поврзување на повеќе уреди,“ вели Ѓуровиќ.
„Во моментов, околу 65% од нашите корисници во Албанија се на припејд услуги, додека 35% користат постпејд пакети. Бројот на припејд корисници значително расте за време на туристичката сезона, бидејќи многу туристи користат припејд картички. Нашата цел е да ги префрлиме корисниците на постпејд услуги, пред сè, преку подобри понуди и поедноставување на процесот за плаќање,“, додава тој.
ШТО ЌЕ ИМ ПОНУДИ ТРЕТИОТ МОБИЛЕН ОПЕРАТОР НА ГРАЃАНИТЕ?
Секој оператор кој планира да купи сопствен спектар и да изгради своја мрежа мора да има силна понуда за потрошувачите, бидејќи тоа е најважниот пазар, велат од унгарската компанија. Свесни се дека им е потребен амбициозен бизнис план за да освојат што позначителен дел од мобилниот пазар за потрошувачи.
„Поради нашата силна ИТ позадина, ќе треба да изградиме и пазар за деловни корисници, бидејќи таму можеме да понудиме дигитални услуги откако ќе ги привлечеме првите клиенти со телекомуникациски услуги. Потрошувачите и мобилниот сектор се нашиот главен фокус, но секако, постојат и ТВ услуги и домашна конекција, што е тренд на меѓународно ниво. Дефинитивно, сакаме да создадеме платформа од која ќе можеме да го освоиме пазарот на домашни и ТВ корисници“, вели директорот за мобилни и 5Г стратегии на групацијата 4iG, Пал Заранди.
Од унгарската компанија велат дека им е познато дека во Северна Македонија корисниците често имаат двегодишни договори. Покрај тоа, постои и концептот на пакет услуги. И двата големи оператори ги комбинираат мобилните и ТВ услугите, што понекогаш го отежнува напуштањето на нивните услуги од страна на корисниците.
„Ова е важен фактор во нашиот бизнис план и поминуваме многу време за да ги разбереме овие динамики. Но, имаме план за тоа. Очигледно, мора да најдеме решение како да ги убедиме овие корисници дека вреди да се префрлат кај нас и да ја користат нашата мрежа и услуга. Сепак, би рекол дека тоа е најголемиот предизвик“.
