Аналитика
Елон Маск вчера стана најбогата личност на светот откако богатството го надмина основачот на Амазон Џеф Безос.
Она што го издвојува од другите милијардери е дека неговите проекти се насочени кон подобрување на квалитетот на животот на земјата и долгорочното спасување на човештвото.
Маск е роден во 1971 година во Преторија, Јужна Африка.
Сам се научил програмирање кога имал 12 години. На 17-годишна возраст се преселил во Канада, а подоцна во САД, каде што студирал физика и економија.
Како се збогати?
Во 1995 година, тој ја основа својата прва компанија за софтвер Зип2, која бил еден вид „водич за интернет-град“ и била купена од Компак четири години подоцна за 340 милиони долари.
Тогаш Маск го основал X.com, што било систем за плаќање преку Интернет. Компанијата се споила со Confinity за да на крај го создаде познатиот PayPal, кој е купен од eBay во 2002 година за 1,5 милијарди долари. После тоа, Маск ги основа своите компании со кои управува и денес и во кои тој и целиот свет вложуваат многу надеж.
SpaceX
Во мај 2002 година, Маск го основаше SpaceX за да гради вселенски возила и транспорт во вселената. Во септември 2008 година, SpaceX стана првата приватна компанија што го лансираше сателитот, Сокол 1, во орбитата.
Во декември 2015 година, SpaceX за прв пат лансираше ракета, која успешно се врати на Земјата. Дотогаш, ракетите беа користени само за едно лансирање на сателит. Со употреба на ракети кои се враќаат на земјата и можат повторно да се користат, цената на вселенските програми е драстично намалена.
Крајната цел на Маск е да се создаде човечка колонија на Марс, за која верува дека ќе има 80.000 жители до 2040 година.
Маск верува дека колонизацијата на универзумот е неопходна за да се обезбеди долгорочен опстанок на луѓето.
Тесла
Компанијата Тесла е основана во 2003 година, а првиот електричен автомобил го произведе во 2008 година.
Во 2014 година, Маск ја стави на располагање целата технологија на Тесла за сите автомобилски компании, кои дотогаш воопшто не се занимаваа со овој вид возила.
Денес, сите светски гиганти преминуваат на производство на електрични автомобили, во кои Тесла има огромна заслуга.
SolarCity
Во 2006 година, Маск ја ко-основаше SolarCity за развој на сончевата енергија.
До 2013 година, компанијата стана вториот најголем производител на системи за соларна енергија во САД.
SolarCity подоцна стана подружница на Тесла. Главната цел на Tesla и SolarCity е да го намалат глобалното затоплување.
ОпенАИ
Во 2015 година, Маск ко-основаше непрофитната компанија ОпенАИ, чија цел е развој на вештачка интелигенција во корист на луѓето и достапна за секого.
Маск предупреди дека големите корпорации можат да добијат премногу моќ со поседување на суперинтелигентни системи дизајнирани за да остварат профит, и дека владите можат да користат вештачка интелигенција за да ги контролираат граѓаните.
Други проекти
Маск е основач на Неуролинк, невротехнолошка компанија фокусирана на истражување на врската и поврзување на мозокот и компјутерите. Тој е исто така основач на Boring Company за копање тунели. Тој е основач на концептот „Hyperloop“, односно на супербрзи возови кои треба да возат со брзина од околу 1.000 километри на час.
Брзиот раст на Тесла го направи Маск денес да вреди околу 190 милијарди долари. Но, интересно е што, поголемиот дел го стекна минатата година и почетокот на оваа година. Само минатата година, неговото богатство се зголеми за околу 140 милијарди.
Ова е последица на остриот раст на акциите на Тесла, со што се зголеми производството и се здоби со огромна доверба кај инвеститорите во нејзиниот понатамошен раст во наредниот период.
Инвеститорите сметаат дека оваа компанија има голема иднина, односно дека допрва доаѓа времето, со оглед на тоа што е насочена кон развој на електрични автомобили.
